Prezident Shavkat Mirziyoev “Ózbekneftgaz” akcionerlik jámiyetiniń jumıs nátiyjeliligin arttırıw máseleleri boyınsha prezentaciya menen tanıstı.
Mámleketimizde energetika qáwipsizligin bekkemlew, energiya resursları, sonıń ishinde, tábiyǵıy gazge bolǵan ishki talaptı turaqlı qanaatlandırıw jáne ekonomika tarmaqların úzliksiz támiyinlew boyınsha izbe-iz jumıslar ámelge asırılmaqta. Sonıń menen birge, ekonomika hám xalıqtıń tábiyǵıy gazge bolǵan talabınıń artıp baratırǵanı jańa rezervlerdi anıqlaw, bar kánlerdiń nátiyjeliligin arttırıw hám jańaların iske qosıwdı talap etpekte.
Usı múnásibet penen “Ózbekneftgaz” akcionerlik jámiyetiniń aldına tarawda nátiyjelilikti túpkilikli arttırıw hám zamanagóy kózqaraslardı engiziw wazıypaları qoyılǵan.
Atap ótilgenindey, 2025-jılı jámiyet kárxanaları tárepinen 25,2 milliard kub metr tábiyǵıy gaz qazıp shıǵarılıp, 56 jańa qudıq burǵılandı, 29 qudıq tolıq ońlandı.
2026-2027-jıllarda tábiyǵıy gaz shıǵarıw kólemin turaqlı dárejede támiyinlew, 300 den aslam geologiyalıq-texnikalıq ilajlardı ámelge asırıw rejelestirilgen.
Prezentaciyada bunıń ushın ámelge asırılıwı kerek bolǵan tiykarǵı wazıypalar haqqında málimleme berildi.
Sonıń ishinde, geologiyalıq-izlew hám geologiyalıq-texnikalıq ilajlardıń nátiyjeliligin arttırıw, rezervlerdi kóbeytiw hám qazıp shıǵarıw kólemleriniń turaqlılıǵın támiyinlew, satıp alıw tártip-qaǵıydaların jetilistiriwge ayrıqsha itibar qaratıladı.
Sonday-aq, gazdi tereń qayta islew arqalı qosımsha qun shınjırın jaratıw, importtıń ornın basatuǵın eksportqa qolaylı ónimler islep shıǵarıw, jámiyet hám onıń kárxanaların finanslıq salamatlandırıw ilajları kóriledi.
Kompaniya jumısında operaciyalıq nátiyjelilikti arttırıw, atap aytqanda, tarawǵa baylanıslı bolmaǵan aktivlerdi biykar etiw, qáwenderlik tólemlerin toqtatıw hám qárejetlerdi optimallastırıw arqalı finanslıq turaqlılıqtı támiyinlewge tiykarǵı áhmiyet qaratılatuǵını atap ótildi.
Óndiris processlerin sanlastırıw, tarawda jasalma intellekt texnologiyaların keńnen engiziw, sonday-aq, ishki qadaǵalaw hám komplaens sistemasın kúsheytiw, finanslıq aktivlerdiń háreketin qadaǵalaw, korrupciya hám mápler soqlıǵısıwınıń aldın alıw máseleleri jámiyet jumısınıń áhmiyetli tiykarǵı baǵdarları sıpatında belgilendi.
Mámleketimiz basshısı bul wazıypalar hám rejelestirilgen barlıq ilajlardıń orınlanıwın anıq esap-sanaq, qatań tártip hám jeke juwapkershilik tiykarında támiyinlew boyınsha juwapkerlerge tapsırmalar berdi.
Prezentaciyada geologiya-izlew jumısların alıp barıw procesinde, sonıń ishinde, Surxandárya wálayatında atap ótilgen texnogen jaǵdaylarǵa da toqtap ótildi. Bunday jaǵdaylar jańa perspektivalı maydanlardı izlew, qudıqlardı tereń burǵılaw hám geologiyalıq qatlamlardı úyreniw processleriniń tábiyǵıy quramlıq bólegi bolıp, olar dúnya ámeliyatında da kóp ushırasıp turadı. Elimizde bunday jaǵdaylarda tiyisli ilajlar kórilip atırǵanı atap ótildi.
Prezidentimiz juwapkerlerge geologiyalıq izertlewler alıp barılıp atırǵan aymaqlarda turaqlı monitoringti kúsheytiw, zamanagóy qadaǵalaw texnologiyaların engiziw jáne xalıqtıń qáwipsizligin támiyinlew máselelerine ayrıqsha itibar qaratıw boyınsha kórsetpeler berdi.

ÓzA