Hámmemizge málim bolǵanınday 15 –yanvarda mámleketimizde xalıqtı hám awıl xojalıǵın dizimge alıw ilajları rásmiy túrde baslandı. Bul áhmiyetli ilajǵa respublikamızdıń barlıq aymaqlarında puqta tayarlıqlar kórilip, arnawlı dúzilgen jumısshı toparlar tárepinen belgilengen is-reje tiykarında jumıslar alıp barılmaqta.
Atap aytqanda, usı process sheńberinde Milliy statistika komiteti tárepinen onlayn sorawnamanı durıs hám tolıq toltırǵan puqaralar arasında tosınnan tańlaw (random) tiykarında sıylıq tańlawı ótkerilmekte.
Tańlaw nátiyjelerine bola, Qaraózek rayonı Qaraózek awıl puqaralar jıyını turǵını Párwaz Mambetniyazova jeńimpaz dep tabılıp, planshet hám basqa da estelik sawǵalar menen sıylıqlandı.
Jeńimpazdı sıylıqlaw máresimine Qaraqalpaqstan Respublikası statistika basqarması baslıǵı T.Ǵaniev hám rayon hákiminiń birinshi orınbasarı B.Ayapbergenovlar qatnasıp, Párwaz Mambetniyazovaǵa bul áhmiyetli ilajda belsendilik kórsetkeni ushın óz minnetdarshılıqların bildirdi.
Ilaj juwmaǵında juwapker taraw wákillerine xalıq arasında dizimge alıw procesindegi belsendilikti jáne de arttırıw, maǵlıwmatlardı anıq hám juwapkershilik penen toltırıw boyınsha tiyisli kórsetpler berildi.

Qaraqalpaqstan xabar agentligi