Press-konferenciya

Biziń jasap atırǵan kúndelikli turmısımızda quwanıshlı jaǵdaylar menen qosa járdemge mútáj bolatuǵın qolaysız jaǵdaylar da ushırasıp turadı. Bir ǵana qáteshilik yamasa itibarsızlıqtıń aqıbetinde hár qıylı kewilsiz jaǵdaylar kelip shıǵıwı múmkin. Sergeklik hám belgilengen qaǵıydalarǵa muwapıq is alıp barılsa kewilsiz jaǵdaylardıń aldı alınıwı múmkin al, kerisi bolsa, bizge járdemge jetip keletuǵın insanlarǵa mútájligimiz artadı. Ásirese, jazdıń ıssı kúnlerinde órt al, qıstıń qırawlı kúnlerinde eń kóp usharasatuǵın záhárli gazden zıyanlanıw, sonday-aq basqa da apatlardan jábir kórgenlerge járdem qolın sozatuǵın Ayrıqsha jaǵdaylar basqarması xızmetkerleriniń qáweterge tolı xızmet wazıypasın Ayrıqsha jaǵdaylar basqarması Xojeli rayonı bóliminde bolıp ótken oqıw-shınıǵıw wazıypaların ornınlaǵan waqıtlarında kórip gúwası boldıq.
Ayrıqsha jaǵdaylar Xojeli rayonı bóliminde ótken 2025-jıl ámelge asırılǵan jumıslardıń juwmaǵı boyınsha ǵalaba xabar quralları wákilleriniń qatnasıwında press-konferenciya shólkemlestirildi. Onda sózge shıqqan Qaraqalpaqstan Respublikası ayrıqsha jaǵdaylar basqarmasınıń baspa sóz xatkeri A.Abdiraxmanov hám Xojeli rayonı ayrıqsha jaǵdaylar bólimi baslıǵı Q. Ámetovlar ótken jıl dawamında alıp barılǵan jumıslar boyınsha maǵlıwmatlar berdi. Atap ótiliwinshe qıs kúnleri záhárli gazden puqaralardıń záhárlenip, hár qıylı kewilsiz jaǵdaylarǵa ushırap atırǵanlıǵı puqaralardıń qánigelerdiń hár qanday úgit-násiyat jumsıların alıp barıwına qaramastan shańaraǵındaǵı ısıtıw sistemaların belgili qádelerge ámel etpesten jaǵıwı hám pech morıların tazalatpawı menen xanalarda hawa ótkiziwshi orınlardıń joqlıǵı, tiykarınan itibarsızlıq aqıbetinde kelip shıǵıp atırǵanlıǵı mısallar menen aytıp ótildi.
Sonday-aq, ilajda atap ótiliwinshe 2025-jıl 12 ay dawamında rayonda jámi 52 ɵrt jaǵdayı esapqa alınǵan. Bul kórsetkish 2024-jıl 12-ay dawamında 30 órt jaǵdayı bolǵan bolsa, 22 órtke kóbeygen. Solardan, 38 órt puqaralardıń turaq jaylarında, 1 órt awıl xojalıǵı jerlerinde, 9 órt ashıq maydanlarda, 4 órt avtotransport qurallarına júz bergen. Demek, órtlerdiń basım kɵpshiligi derlik 75 procenti puqaralardıń turaq jaylarında júz bergen. Sonday-aq, 65 márte qıyın jaǵdayda qalıp múrájat etken puqaraǵa qutqarıwshılar tárepinen ámeliy járdemler berilgen.
Gúz-qıs máwsiminde bólim hám tiyisli taraw wákilleri menen birgelikte úyreniwler, tekseriwler, profilaktikalıq túsinik jumısları alıp barıwılıwına qaramastan, puqaralardıń káwipsizlik qádelerine ámel etpewleri nátiyjesinde 1 jaǵdayda 3 puqara, sonıń ishinde ekewi jas óspirimler bolıp, ısıtıw qazanları, pech morıların máwsim aldınan tazalamaǵanlıǵı nátiyjesinde awır kewilsiz jaǵdaylar júz bergen.
Bunıń sebebi úy ishine yaki jasaw xanasına jasalma tárizde islengen jılıtıw qazanın ornatıp, qáwipsizligin támiynlemey yaǵnıy morısın tazalamay, saz yaki nasazlıǵın teksermey turıp gazdi jaǵıp paydalanıp atırǵanlıǵı aqıbetinde júz bermekte.
Rayon aymaǵında jámi 130 den aslam kóp qabatlı turaq jaylarda 2524 ǵa jaqın xanalar (kvartiralar) bar bolıp, basım kópshiligi eski dáwirlerde salınǵan jaylar bolıp, aldaǵı waqıtları ısıtıw sisteması oraylıq bolǵanlıǵı, sońınan puqaralar tárepinen óz úylerine qolbala usılda islengen ısıtıw qazanxanaların ornatıp alıwı sebep bolmaqta.
Bólim inspektorları tárepinen jıl dawamında mámlektlik obektler hámde isbilermenlik subektlerinde órtke qarsı tekseriwler ótkerilip, obektlerde anıqlanǵan kemshilikler boyınsha juwapkerlerge hákimshilik bayannamalar rásmiylestirilgen.
Rayon aymaǵında jıl dawamında ayrıqsha jaǵdaylardıń aldın alıw boyınsha karxana, shólkemler máhellelerde jıynalıslar ótkerilip, onda júz beriwi múmkin hár túrli ayrıqsha jaǵdaylar hámde órt qáwipsizligi qádeleri boyınsha túsinik jumısları alıp barılǵan.
Ilaj sheńberinde bólim xızmetkerleriniń qatnasıwında oqıw-shınıǵıw jumısları alıp barılıp, onda órt kelip shıqqanda alıp barılatuǵın ilajlar ámelde kórsetildi. Sonday-aq, ǵalaba xabar quralları xızmetkerleri tárepinen qánigelerge sorawlar berilip, tiyisli juwaplar alındı. Órt kelip shıqqanda paydalanılatuǵın qánigelerdiń quralları kórgizbesi de qatnasıwshılarda ayrıqsha tásirler qaldırdı.

G.Turdıshova, Qaraqalpaqstan xabar agentligi