Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında student-jaslar ushın “Jawızlıqqa qarsı aǵartıwshılıq” atamasında ruwxıy-aǵartıwshılıq ushırasıw shólkemlestirildi.
Maqset – jaslardıń dúnyaǵa kózqarasın keńeytiw, olardı hár qıylı zıyanlı ideyalardan xabardar etiw jáne ilim hám aǵartıwshılıqqa bolǵan qızıǵıwshılıǵın arttırıwdan ibarat.
Ushırasıwdı filial direktorınıń Jaslar máseleleri hám ruwxıy-aǵartıwshılıq isleri boyınsha birinshi orınbasarı X.Abdijaliev ashıp, búgingi kúnde jaslarǵa berilip atırǵan tálim-tárbiya jámiyettiń rawajlanıwınıń tiykarǵı faktorlarınan biri ekenin atap ótti.
Ilajda Ózbekstan Respublikası Din isleri boyınsha komiteti Qaraqalpaqstan Respublikası aymaqlıq basqarmasınıń Nókis qalalıq qánigeleri qatnasıp, jaslar menen ashıq pikirlesti.
Olar diniy keńpeyillik, milletler aralıq tatıwlıq hám salamat isenim máselelerine toqtap ótip, hár qıylı nadurıs kózqaraslar hám jalǵan xabarlarǵa qarsı sanalı túrde qatnas jasaw áhmiyetli ekenligin túsindirdi. Sonday-aq, qánigeler tárepinen búgingi málimleme aǵımı kúsheygen bir dáwirde jaslardıń sın kózqarastan pikirlewi, isenimli dereklerdi ajırata alıwı hám sociallıq tarmaqlardan durıs paydalanıw mádeniyatı haqqında usınıslar berildi.
Ilaj dawamında studentler ózlerin qızıqtırǵan sorawlarǵa juwap aldı.

Á.Jiyemuratov,
Qaraqalpaqstan xabar agentligi