2025/2026-oqıw jılı ushın magistratura basqıshı boyınsha Ózbekstan Respublikası Prezidenti mámleketlik stipendiyası tańlawınıń respublikalıq basqıshı óz juwmaǵına jetti.
Bul basqıshta Arnawlı tańlaw komissiyası tárepinen respublika kóleminde belgilengen 22 tańlaw baǵdarı boyınsha talabanlar menen sáwbetlesiwler ótkerildi. Sáwbetlesiwler procesinde óz bilimi, potencialı hám qábiletin kórsetken eń múnásip talabanlar jasırın dawıs beriw jolı menen anıqlanıp, nátiyjede 22 jeńimpaz tańlap alındı.
Tańlawdıń juwmaqlawshı nátiyjeleri joqarı bilimlendiriw, ilim hám innovaciyalar ministriniń birinshi orınbasarı Sardor Rajabov tárepinen járiyalandı. Ol óziniń shıǵıp sóylegen sózinde bul basqıshqa jetip keliwdiń ózi úlken jetiskenlik ekenin atap ótip, jeńimpazlardı qızǵın qutlıqladı.
– Sizlerdiń búgingi nátiyjelerińiz erteńgi kúnimizdiń tiykarı, – deydi Sardor Rajabov. – Sizler keleshekte mámleketimizdiń rawajlanıwı hám ilimniń rawajlanıwına múnásip úles qosatuǵınıńızǵa isenemen.
Prezident mámleketlik stipendiyası jeńimpazları Joqarı bilimlendiriw, ilim hám innovaciyalar ministrliginiń Kollegiya qararı menen tastıyıqlanǵannan soń, belgilengen tártipte rásmiy járiyalanadı.

Muhayyo Toshqoraeva, ÓzA