University of Business and Science (UBS) tárepinen ámelge asırılǵan tariyxıy baslama nátiyjesinde Ózbekstannıń bay tariyxı, materiallıq hám ruwxıy miyrası jáne sońǵı jıllarda ámelge asırılıp atırǵan reformalardı óz ishine alǵan kitaplar toplamı Amerika Qurama Shtatlarında jaylasqan dúnyanıń birinshi sanlı joqarı bilimlendiriw mákemesi – Massachusets texnologiya institutı (MIT) nıń oraylıq Xayden kitapxanası fondına qabıl etildi.
Kúni keshe AQShtıń Boston qalasında bul kitaplar toplamı MIT kitapxanası direktorı Kris Burǵa rásmiy túrde tapsırıldı.
Toplam 120 dan aslam ilimiy, tariyxıy hám ádebiy shıǵarmalardı qamtıp alǵan. Onda Ózbekstan Respublikası Prezidentiniń shıǵarmaları, Jańa Ózbekstan tariyxı, mádeniy miyras hám tariyxıy estelikler, klassikalıq ádebiyat hám sufizm miyrası, jadidshilik háreketi, milliy oyanıw dáwiri hám XX ásir ózbek ádebiyatına baylanıslı fundamental derekler orın alǵan.
Bul baslamadan gózlengen tiykarǵı maqset – ózbek xalqınıń úsh mıń jıllıq dańqlı tariyxı, bay ruwxıy-aǵartıwshılıq miyrası, milliy-etnikalıq tiykarları hám qádiriyatların, sonday-aq, sońǵı jıllarda Ózbekstan Respublikası Prezidenti basshılıǵında ámelge asırılıp atırǵan keń kólemli reformalardı xalıqaralıq akademiyalıq jámiyetshilikke keńnen úgit-násiyatlawdan ibarat.
Endi MIT oraylıq kitapxanasınıń paydalanıwshıları – jetekshi ilimpazlar, izertlewshiler hám studentler Jańa Ózbekstan tariyxı hám mádeniyatı boyınsha birinshi márte kompleksli, isenimli hám tereń derekler tiykarında ilimiy izleniwler alıp barıw imkaniyatına ie boldı.
Bul baslama UBS universitetiniń xalıqaralıq ilimiy-mádeniy birge islesiwdi rawajlandırıw, milliy miyrastı globallıq ilimiy mákanǵa alıp shıǵıwǵa qaratılǵan strategiyalıq maqsetlerine tolıq sáykes keledi hám joqarı oqıw ornı tariyxında áhmiyetli waqıya sıpatında tán alınbaqta.
Atap ótiliwinshe, MIT kitapxanası fondına ádebiyatlar qatań akademiyalıq ólshemler tiykarında tańlap alınadı. “Jańa Ózbekstan” kitaplar toplamınıń usı abıraylı mákeme kitapxanasınan orın alıwı mámleketimizde ámelge asırılıp atırǵan reformalardıń xalıqaralıq kólemde tán alınıp atırǵanınan derek beredi.
Sonday-aq, dúnyanıń jetekshi joqarı bilimlendiriw mákemesiniń oraylıq kitapxanasında “Ózbek kitapları toplamı múyeshi” (Uzbek Books Collection Corner) shólkemlestirilip, barlıq toplamlar usı orınǵa jaylastırıladı.

Mohigul Qosimova, ÓzA