Búgin Tashkent qalasındaǵı “IT Park Uzbekistan” kongress-orayında “30 jaslılar dáwiri” temasındaǵı besinshi xalıqaralıq basqarıw forumınıń ekinshi kún ilajları bolıp ótpekte.
Xalıqaralıq forum mámleketlik uyımlar, jeke menshik sektor, xalıqaralıq ekspertler hám jas qánigelerdi bir maydanǵa jámlegenin atap ótiw kerek.
Onda shıǵıp sóylegenler mámleketimizdiń rawajlanıwında jaslardıń potencialın arttırıw, bilimlendiriwdiń sapasın jaqsılaw, sanlı kónlikpelerdi rawajlandırıw hám jasalma intellekt texnologiyalarınan ekonomika hám jámiyet mápleri jolında nátiyjeli paydalanıw máselelerine ayrıqsha itibar qarattı. Atap ótilgenindey, 2026-jıl Ózbekstan Respublikası Prezidenti Shavkat Mirziyoevtiń baslaması menen “Máhállelerdi rawajlandırıw hám jámiyetti ilgeriletiw jılı” dep járiyalanǵan bolıp, bul bolsa máhállelerdi ekonomikalıq hám sociallıq jaqtan qollap-quwatlaw, jaslardı jámiyetlik turmısqa keńnen tartıwǵa qaratılǵan strategiyalıq baǵdar bolıp esaplanadı.
Usı kózqarastan, forum jaslardıń jámiyettegi belsendi rolin bekkemlew, sanlı ekonomikanı rawajlandırıw, isbilermenlik baslamaların qollap-quwatlaw hám juwapkershilikli biznes principlerin alǵa qoyıw ushın áhmiyetli sóylesiw maydanı wazıypasın atqaradı. Forumnan gózlengen tiykarǵı maqset Jańa Ózbekstannıń rawajlanıwı jolında jaslardı hár tárepleme qollap-quwatlaw, olar menen ashıq hám sistemalı sóylesiwdi jolǵa qoyıwdan ibarat.
Ilajda bilimlendiriw hám zamanagóy kónlikpeler jaslardıń básekige shıdamlılıǵın arttırıwda sheshiwshi faktor ekeni atap ótildi. Ásirese, sanlı texnologiyalar hám jasalma intellekt tarawındaǵı bilimler miynet bazarında talap joqarı bolǵan baǵdarlardan biri sıpatında bahalandı. Usı múnásibet penen forumda sanlı kónlikpeler, jasalma intellekt texnologiyaları hám málimleme texnologiyaları xızmetleriniń eksportı ekonomika strukturasın jańalaw hám onıń turaqlı ósiwin támiyinlewde áhmiyetli kúsh ekeni atap ótildi.
– Bul ilajdıń tiykarǵı ideyası jas áwladta erkin pikirlew, juwapkershilikli qarar qabıl etiw hám jámiyet aldındaǵı parızın túsiniwge, mádeniyatın qáliplestiriwge qaratılǵan. Shańaraq, máhálle hám jumıs ornında qáliplesetuǵın sociallıq qatnasıqlar keleshekte jaslardıń puqaralıq poziciyasına tikkeley tásir kórsetedi. Sonday-aq, forum zamanagóy korporativ mádeniyattı rawajlandırıw, jumıs beriwshiler hám jas qánigeler arasında óz-ara isenimdi bekkemlewge xızmet etetuǵın platforma sıpatında shólkemlestirildi, – dedi Xalıqaralıq basqarıw forumı shólkemlestiriw komitetiniń baslıǵı Timur Yadgarov.
Esletip ótemiz, “30 jaslılar dáwiri” temasındaǵı besinshi Xalıqaralıq basqarıw forumı búgin óz jumısın juwmaqlaydı.

Nasiba Ziyodullaeva,
Nosirjon Haydarov (foto), ÓzA