Prezident Shavkat Mirziyoev 30-yanvar kúni Tashkent qalasında Islam Kárimovtıń esteligine gúl qoydı.
Tariyxıy estelik – millet kelesheginiń bekkem tiykarı. Ózbekstannıń ǵárezsiz mámleket sıpatında qáliplesiwi, mámleketshilik tiykarlarınıń qurılıwında Birinshi Prezident Islam Kárimovtıń xızmetleri sheksiz ekeni tereń húrmet hám tán alınıw menen eske alınadı.
Mámleketimiz basshısı Shavkat Mirziyoevtiń baslaması hám itibarı menen Birinshi Prezidenttiń esteligi máńgilestirildi, Samarqandta onıń maqbarası qurıldı. Islam Kárimov tuwılǵan 30-yanvar sánesin belgilew jaqsı dástúrge aylandı.
Máresim dawamında Quran oqılıp, pátiya etildi. Birinshi Prezidenttiń Watan mápleri jolındaǵı jumısı, adamgershilik pazıyletleri eske alındı.
Islam Kárimov atındaǵı ilimiy-aǵartıwshılıq estelik kompleksinde bolıp ótken máresimde Oliy Majlis palataları, Prezident Administraciyası hám húkimet wákilleri, ilim hám mádeniyat ǵayratkerleri, jámiyetshilik wákilleri qatnastı.
Sonday-aq, Birinshi Prezidenttiń Samarqand hám Qarshı qalalarındaǵı esteliklerine de gúller qoyılıp, esteligine húrmet kórsetildi.