Ózbekstan Respublikası Prezidenti Shavkat Mirziyoev Túrkiya Respublikası Prezidenti Rejep Tayyip Erdoǵannıń mirát etiwine bola 29-yanvar kúni rásmiy sapar menen usı mámlekette boldı.
Ankara qalasındaǵı “Esenboǵa” xalıqaralıq aeroportında Ózbekstan Respublikası Prezidenti Shavkat Mirziyoev hám ómirlik joldasın Túrkiya Respublikası Prezidenti Rejep Tayyip Erdoǵan hám ómirlik joldası kútip aldı.
Eki mámlekettiń bayraqları kóterildi, húrmetli qarawıl sap tarttı.
Mámleket basshıları hám birinshi xanımlar qısqa ushırasıw ótkerdi.
Sóylesiwde Ózbekstan menen Túrkiya arasındaǵı keń kólemli strategiyalıq sheriklik qatnasıqların keńeytiw máseleleri boyınsha pikir alısıldı.
Bunnan soń Túrkiya Respublikası Prezidentiniń Ankara qalasındaǵı Aqsaray rezidenciyasında Ózbekstan Respublikası Prezidenti Shavkat Mirziyoevti rásmiy kútip alıw máresimi bolıp ótti.
Mámleketimiz basshısın Túrkiya Respublikası Prezidenti Rejep Tayyip Erdoǵan kútip aldı.
Maydanda joqarı mártebeli miyman húrmetine húrmetli qarawıl sap tarttı. Prezidentler Shavkat Mirziyoev hám Rejep Tayyip Erdoǵan minberge kóterildi. Áskeriy orkestrdiń atqarıwında eki mámlekettiń mámleketlik gimnleri jańladı. Jetekshiler húrmetli qarawıl qatarı aldınan ótip, rásmiy delegaciyalar aǵzaların qutlıqladı.
Ankara qalasındaǵı Prezident sarayında Ózbekstan Respublikası Prezidenti Shavkat Mirziyoev hám Túrkiya Respublikası Prezidenti Rejep Tayyip Erdoǵannıń tar sheńberdegi ushırasıwı bolıp ótti.
Sóylesiw aldında mámleket basshıları pútkil musılman úmmeti ushın muqaddes Ramazan ayı kirip kiyatırǵanı menen bir-birin qızǵın qutlıqladı.
Ózbekstan – Túrkiya keń kólemli strategiyalıq sheriklik qatnasıqların, atap aytqanda, siyasiy, sawda-ekonomikalıq, mádeniy hám gumanitarlıq tarawlarda bunnan bılay da keńeytiw máseleleri hár tárepleme dodalandı.
Barlıq dárejelerdegi joqarı pát hám jedel sóylesiwler qanaatlanıwshılıq penen atap ótildi. Tárepler jaqında bolıp ótken Strategiyalıq rejelestiriw toparınıń “4+4” formatındaǵı ushırasıwınıń erisilgen nátiyjelerin qollap-quwatladı.
Óz-ara tovar almasıw kólemi, birgeliktegi kárxanalar, mámleketler arasındaǵı aviaqatnawlardıń sanı izbe-iz ósip barmaqta. Turaqlı túrde birgeliktegi mádeniy ilajlar ótkerilip kelinbekte.
Sanaat, awıl xojalıǵı, sociallıq qorǵaw hám basqa da tiykarǵı baǵdarlarda joybarlar menen baǵdarlamalardı alǵa qoyıw zárúr ekenligi atap ótildi.
Qorǵanıw hám qáwipsizlik tarawında, kiberjınayatshılıqqa qarsı gúresiw baǵdarında birge islesiw hám óz-ara muwapıqlasıwdı bekkemlewge ayrıqsha itibar qaratıldı.
Jetekshiler xalıqaralıq hám regionallıq kún tártibindegi áhmiyetli máseleler boyınsha da pikir alıstı.
Soń Ózbekstan Respublikası Prezidenti Shavkat Mirziyoev hám Túrkiya Respublikası Prezidenti Rejep Tayyip Erdoǵannıń basshılıǵında joqarı dárejedegi Strategiyalıq birge islesiw keńesiniń tórtinshi májilisi bolıp ótti.
Tárepler bul májilis múbárek Ramazan ayı jáne eki mámleket arasında Máńgi doslıq hám birge islesiw haqqındaǵı shártnamaǵa qol qoyılǵanına 30 jıl tolıwı aldında ótip atırǵanı rámziy mánige iye ekenin atap ótti.
Siyasiy sóylesiw jedel rawajlanıp atırǵanı, xalıqaralıq máseleler boyınsha táreplerdiń poziciyası uqsas ekeni qanaatlanıwshılıq penen atap ótildi.
Birlesken Milletler Shólkemi, Túrkiy mámleketler shólkemi, Islam birge islesiw shólkemi, Ekonomikalıq birge islesiw shólkemi hám basqa da strukturalar sheńberinde óz-ara qollap-quwatlawdı dawam ettiriwge kelisip alındı.
Parlamentleraralıq baylanıslar, sonıń ishinde, doslıq toparları sheńberinde jedellesti.
Óz-ara sawda kólemi, sonday-aq, Túrkiyanıń jetekshi kompaniyaları menen birgeliktegi kárxana hám joybarlardıń sanı izbe-iz ósip barmaqta.
Kelesi jıllarda tovar almasıw kólemin, sonıń ishinde, Jeńilletilgen sawda haqqındaǵı kelisimdegi tovarlar dizimin keńeytiw arqalı 5 milliard dollarǵa jetkeriw wazıypası belgilep alındı.
Saparǵa tayarlıq sheńberinde óz aldına baǵdarlama tiykarında ámelge asırılıwı názerde tutılǵan sanaat kooperaciyasınıń jańa tiykarǵı baǵdarları islep shıǵılǵan.
Sonday-aq, aymaqlararalıq birge islesiwdiń úlken potencialı atap ótildi. Jıldıń aqırına shekem Ózbekstannıń barlıq wálayatlarınan delegaciyalar birge islesiwshi aymaqlar menen joybarlar portfelin islep shıǵıw maqsetinde Túrkiyaǵa baradı.
Awıl xojalıǵı, baǵshılıq, densawlıqtı saqlaw hám medicinalıq turizm tarawlarında Túrkiyanıń aldınǵı tájiriybesin engiziw zárúr ekenligi atap ótildi.
Turizm baǵdarında baylanıslardı rawajlandırıw, teatr festivalları hám mádeniyat hápteliklerin ótkeriw, tariyxıy filmlerdi birgelikte islep shıǵarıw, mádeniy miyras obektlerin birgelikte tiklewge ayrıqsha itibar qaratıldı.
Bilimlendiriw tarawındaǵı birge islesiwdi tereńlestiriw maqsetinde usı jılı báhárde Buxarada tórtinshi Rektorlar forumın ótkeriwge kelisip alındı.
Sonday-aq, Birgeliktegi húkimetleraralıq komissiya járdemshi baslıqlarınıń kóp qırlı birge islesiwdiń perspektivalı baǵdarları boyınsha esabatları tıńlandı.
Májilis juwmaǵında eki mámleket húkimetlerine qabıl etilgen qararlardı ámelge asırıw boyınsha “jol kartası”n tastıyıqlaw tapsırıldı.
Shavkat Mirziyoev Rejep Tayyip Erdoǵanǵa Ózbekstanǵa sapar menen keliwdi usınıs etti.
Joqarı dárejedegi Strategiyalıq birge islesiw keńesiniń tórtinshi májilisiniń juwmaqları boyınsha Ózbekstan Respublikası Prezidenti Shavkat Mirziyoev hám Túrkiya Respublikası Prezidenti Rejep Tayyip Erdoǵan Birgeliktegi bildiriw jáne Keń kólemli strategiyalıq sheriklik sheńberindegi birge islesiw mexanizmleri haqqındaǵı qararǵa qol qoydı.
Bunnan tısqarı, kóp qırlı sherikliktiń hár qıylı baǵdarların qamtıp alǵan eki tárepleme hújjetler toplamına qol qoyıldı. Atap aytqanda:
– densawlıqtı saqlaw, bilimlendiriw hám áskeriy medicina tarawlarındaǵı birge islesiw haqqında;
– ekonomikalıq hám finanslıq birge islesiw haqqında;
– kánshilik sanaatında óz-ara birge islesiw haqqında;
– xalıqaralıq transport koridorların rawajlandırıw boyınsha birge islesiw haqqında;
– arnawlı ekonomikalıq zonalar tarawındaǵı birge islesiw haqqında;
– yadrolıq qáwipsizlik, fizikalıq qorǵaw, kepillikler hám radiaciyalıq qorǵaw tarawındaǵı birge islesiw hám málimleme almasıw haqqında;
– migraciyaǵa járdemlesiw hám puqaralardı óz mámleketine qaytarıw tarawındaǵı birge islesiw haqqında;
– Ózbekstan Respublikası Din isleri boyınsha komiteti hám Túrkiya Din isleri basqarması arasındaǵı birge islesiw haqqında húkimetleraralıq kelisimler;
– Sırtqı isler ministrlikleri arasında 2026-2027-jıllarǵa mólsherlengen birge islesiw baǵdarlaması;
– Ózbekstan Jeńil sanaattı rawajlandırıw agentligi hám Túrkiya Joqarı bilimlendiriw keńesi arasında protokol;
– Mádeniyat tarawında 2026-2027-jıllarǵa mólsherlengen birge islesiw rejesi.
Ózbekstan Respublikası Prezidenti Shavkat Mirziyoev hám Túrkiya Respublikası Prezidenti Rejep Tayyip Erdoǵan Ankara qalasında bolıp ótken joqarı dárejedegi Strategiyalıq birge islesiw keńesiniń tórtinshi májilisiniń juwmaqları boyınsha ǵalaba xabar quralları wákilleri ushın bayanat berdi.
Mámleketimiz basshısı sóziniń aldında túrkiyalı kásiplesine kórsetilgen miymandoslıq hám keńes sheńberindegi nátiyjeli sóylesiwler ushın shın júrekten minnetdarshılıq bildirdi.
Búgingi kúnde Túrkiya barlıq tarawlarda úlken jetiskenliklerge erisip atırǵanı hám tek ǵana musılman dúnyasında emes, al globallıq kólemde de haqılı túrde joqarı húrmet-itibarǵa eriskeni ayrıqsha atap ótildi.
Keyingi jıllarda Ózbekstan – Túrkiya doslıq hám keń kólemli strategiyalıq sheriklik qatnasıqları sapa jaǵınan jańa basqıshqa kóterilgeni qanaatlanıwshılıq penen atap ótildi.
Ótken jılı óz-ara sawda kólemi 3 milliard dollardan, qospa kárxanalardıń sanı bolsa 2,2 mıńnan arttı, ózlestirilgen investiciyalardıń ulıwma kólemi derlik 10 milliard dollardı quradı.
Eki mámleket arasında háptesine 100 ge shamalas aviaqatnawlar ámelge asırılmaqta. Túrkiyanıń jetekshi kompaniyalarınıń qatnasıwında 9 milliard dollarlıq joybarlar portfeli qáliplestirilgen.
Keńes májilislerin turaqlı túrde ótkeriw, Húkimetleraralıq komissiya hám Strategiyalıq rejelestiriw toparı mexanizmlerinen nátiyjeli paydalanıw haqqında qararlar qabıl etildi.
Birlesken Milletler Shólkemi, Islam birge islesiw shólkemi, Túrkiy mámleketler shólkemi hám basqa da abıraylı xalıqaralıq strukturalar sheńberindegi óz-ara qollap-quwatlaw ámeliyatı dawam ettiriledi.
Jetekshiler sawda kólemin, sonıń ishinde, Jeńilletilgen sawda haqqındaǵı kelisim sheńberinde tovarlardıń túrin keńeytiw, ekonomikanıń tiykarǵı tarmaqlarında sanaat kooperaciyasın bekkemlew arqalı 5 milliard dollarǵa jetkeriwge kelisip aldı.
Sonday-aq, mádeniy-gumanitarlıq almasıwlardı bunnan bılay da keńeytiwge, atap aytqanda, birgelikte teatr hám kino háptelikleri, kórkem óner kórgizbelerin ótkeriw jáne zıyarat turizmin rawajlandırıwǵa ayrıqsha itibar qaratıldı.
Keńes májilisiniń juwmaqlarınan kelip shıǵıp, eki mámleket húkimetleri tárepinen erisilgen kelisimlerdi óz waqtında hám sapalı ámelge asırıw boyınsha keń kólemli “jol kartası” qabıl etiletuǵını atap ótildi.
Ankara qalasına rásmiy saparı sheńberinde Ózbekstan Respublikası Prezidenti Shavkat Mirziyoev hám Túrkiya Respublikası Prezidenti Rejep Tayyip Erdoǵan Hatay wálayatında elimiz tárepinen qurılǵan “Ózbekstan” turaq jay kompleksiniń ashılıw máresiminde qatnastı.
Ilajda mámleketimiz basshısı úsh jıl aldın júz bergen wayran etiwshi jer silkiniw tuwısqan túrk xalqı ushın awır sınaq bolǵanın atap ótti. Ózbekstan bul qayǵılı dáwirdiń dáslepki kúnlerinen-aq Túrkiyaǵa hár tárepleme járdem kórsete basladı.
Qısqa waqıtta 100 ózbekstanlı qutqarıwshı hám 70 medicina xızmetkeri apatshılıq júz bergen aymaqqa jetip bardı. Izlew-qutqarıw jumısları nátiyjesinde 18 adam qutqarıldı, 200 ge shamalas jábirlengenler wayranlar astınan alıp shıǵıldı. Dala emlewxanası 4 mıń nawqasqa medicinalıq járdem kórsetti.
Prezident Rejep Tayyip Erdoǵannıń baslaması menen jer silkiniw aqıbetlerin saplastırıw boyınsha keń kólemli baǵdarlamalar ámelge asırılıp atırǵanı ayrıqsha atap ótildi. Búgingi kúnge shekem mámlekette 455 mıńnan aslam turaq jay qurıldı.
Ózbekstan, óz gezeginde, qısqa múddetlerde Xatay wálayatınıń Arsuz rayonında 300 den aslam tolıq úskenelengen kvartira, jámi 24 kóp qabatlı jaydan ibarat barlıq zárúr infrastrukturaǵa ie zamanagóy turaq jay kompleksin qurdı.
Túrkiya Prezidenti bul kompleks tek ǵana jábirlengen shańaraqlar ushın jańa úy emes, al ózbek hám túrk xalıqları arasındaǵı máńgi doslıqtıń ayqın úlgisi ekenin atap ótti.
Jetekshiler joybardı ámelge asırıwda qatnasqan qurılısshılar, injenerler, jumısshılar hám barlıq sheriklerge shın júrekten minnetdarshılıq bildirdi.
Mámleket basshıları jańa kvartiralardıń giltlerin olardıń ielerine saltanatlı túrde tapsırdı.
Sonday-aq, Prezidentler Stambuldıń Bekirkyoy rayonında ózbek mektebiniń qurılısın baslap berdi. Bul dárgay Ózbekstannıń sırt eldegi birinshi bilimlendiriw mákemesi boladı.
Jańa oqıw ornı Túrkiyada jasap atırǵan ózbek shańaraqlarınıń perzentlerine óz ana tilinde bilim alıw menen birge milliy qádiriyatlar, mádeniyat hám dástúrlerdi saqlap qalıw imkaniyatın beredi.
Tárepler bul mektep eki tuwısqan xalıq arasındaǵı baylanıslardı jáne de bekkemlewge xızmet etetuǵınına, jas áwlad ushın áhmiyetli tálim-tárbiya orayına aylanatuǵınına isenim bildirdi.
Usınıń menen Ózbekstan Respublikası Prezidenti Shavkat Mirziyoevtiń Túrkiya Respublikasına rásmiy saparı juwmaqlandı.

ÓzA