Ózbekstan Respublikası Prezidenti Shavkat Mirziyoevtiń Túrkiya Respublikasına rásmiy saparı sheńberinde mámleketimiz Birinshi xanımı Ziroat Mirziyoeva Túrkiya Birinshi xanımı Emine Erdoǵan menen birgelikte “Anqara Palas” muzeyi menen tanıstı.
Anqaranıń tariyxıy orayında jaylasqan muzey derlik mıń kvadrat metr maydandı iyelegen bir ásirge shamalas tariyxqa iye arxitekturalıq imarat bolıp, Túrkiyanıń bay mádeniy hám kórkem miyrasın sáwlelendiredi.
Muzey ekspoziciyasında toqımashılıq úlgileri, farfor buyımlar, qoljazbalar, diplomatiyalıq sawǵalar, respublika tiykarın salıwshısı Mustafa Kamol Atatúrktiń jeke buyımları, sonday-aq, Osmaniyler hám respublika dáwirine baylanıslı zatlar kórsetilmekte. Toplamda xalıqlarımızdıń óz-ara mádeniy baylanıslarınan ayqın derek beretuǵın Buxara ónermentleriniń dóretiwshilik úlgileri ayrıqsha orın iyelegen.
Sapar dawamında miymanlarǵa lipaslar kolekciyası, dástúriy kesteshilik, gúlal ıdıslarǵa naǵıs salıw hám quwırshaq soǵıw processleri kórsetildi. Ziroat Mirziyoeva mádeniy miyrastı qásterlep saqlaw áhmiyetli ekenligin atap ótip, túrk xalqınıń bul wazıypaǵa ayrıqsha itibar menen qatnas jasaytuǵının atap ótti.
Sonday-aq, gumanitarlıq birge islesiwdi jáne de rawajlandırıw eki tárepleme qatnasıqlardıń áhmiyetli baǵdarı bolıp qalıwı, xalıqlarımızdı jaqınlastırıwda mádeniyattıń ayrıqsha ornı bar ekenligi atap ótildi.
Soń eki mámlekettiń Birinshi xanımları arnawlı máresimde qatnastı. Onda mámleket basshıları Xatay wálayatında Ózbekstan tárepinen qurılǵan turaq jay kompleksin ashtı, sonday-aq, Stambulda Ózbekstannıń sırt eldegi birinshi bilimlendiriw mákemesi bolatuǵın mektep qurılısına start berdi.

ÓzA