Mámleketimiz basshısı Shavkat Mirziyoevtiń ideyası hám baslaması tiykarında paytaxtımızda qurılǵan Ózbekstan Islam civilizaciyası orayı Watanımızdıń bay ótmishi, ullı ata-babalarımızdıń miyrası, muqaddes Islam dininiń aǵartıwshılıq hám tınıshlıqtı súyiwshi ideyaların ózinde jámlegen teberik orın bolıp esaplanadı. Bul oraydı kóriw – tańlanıw, háwes, maqtanısh sezimlerin júrekten ótkeriw, múnásiplik juwapkershiligin ańlaw, degeni.
Ózbekstan Jazıwshılar awqamı, Respublikalıq ruwxıylıq hám aǵartıwshılıq orayı, “Jańa Ózbekstan” baspası redakciyasınıń wákilleri, ustaz jazıwshı hám shayırlar, ádebiyattanıwshı ilimpazlar, awdarmashılar, milliy sóz kórkem ónerimizdiń jankúyerleri, jurnalistler bul ullı dárgayǵa bardı.
Tashkent qalasında tereń ilimiy-aǵartıwshılıq juwmaqlar tiykarında boy tiklegen bul oray elimiz tariyxınıń geyde dańqlı, geyde sınaqlı dáwirlerin, Islam dininiń biybaha qádir-qımbatın, ásirler dawamında insaniyattı tań qaldırıp kiyatırǵan Quranı kárimniń tariyxın, onıń ájayıp, hikmetli ózgesheliklerin tereń ańlawda ózine tán áhmiyetke iye bolmaqta.
Bul sawlatlı oraydıń boy tiklewinde mıńlaǵan qurılısshılar, dóretiwshiler, injenerler, ilimpazlar, dintanıwshılar, ónerment hám súwretshiler, dizaynerler, kitapxanashılar, muzeytanıwshılar, ekspertlerdiń mashaqatlı hám pidákerlik miynetleri jámlengen. Júzlegen tákirarlanbas ilimiy-aǵartıwshılıq, innovaciyalıq joybarlar bul oraydıń usınday tartımlı, sawlatlı, bilimler ǵáziynesine aylanıwında ayrıqsha áhmiyetke iye boldı.
Islam civilizaciyası orayı bizlerdiń kimlerdiń áwladları ekenimizdi jáne de tereń ańlaw imkaniyatın beretuǵını menen oǵada qádirli. Prezidentimiz Shavkat Mirziyoevtiń “Islam civilizaciyası orayı tek ǵana ata-babalarımızdıń miyrasın úyreniw ornı emes, al jaslar ilimiy-izertlew jumısında tikkeley qatnasatuǵın belsendi ilimiy-aǵartıwshılıq mákemege aylanıwı kerek,” degen sózleri oraydıń ekspoziciya zalları ústinde jumıs alıp barǵan úlken ilimiy jámááttiń tiykarǵı súreni boldı.
– Kóbinese sırt elli miymanlar bul jerge kelip tańlanadı hám onıń tartımlılıǵı, sırı nede ekeni haqqında oylanadı, – dedi Islam civilizaciyası orayınıń basshısı, Ózbekstan Respublikasında xızmet kórsetken jurnalist Firdavs Abduxoliqov. – Olarǵa aytaman, dúnyanıń kóplegen jetekshi mámleketlerindegi usınday ilimiy dárgaylar, muzeylerde qandı kóresiz, Ózbekstan Islam civilizaciyası orayında bolsa aǵartıwshılıqtı kóresiz, dep. Prezidentimizdiń avtorlıq ideyaları bolǵan bul mega joybar muqaddes islam dininiń aǵartıwshılıq, jaqsılıq, keńpeyillik, bilimge umtılıwshı ideyaların kórsetiwge qaratılǵanı menen xalıqaralıq kólemde de keń jámiyetshiliktiń itibarın tartpaqta.
– Búgingi oǵada qıyın hám sınaqlı dáwirde jawızlıqqa qarsı aǵartıwshılıq eń tiykarǵı qural ekeni barǵan sayın ayqın bolıp barmaqta, – dedi Ózbekstan Jazıwshılar awqamınıń baslıǵı, Ózbekstan xalıq shayırı Sirojiddin Sayyid. – Mámleketimiz basshısınıń ideyası menen qurılǵan bul oray muqaddes islam dininiń jaqsı hám aǵartıwshılıq ideyaların, ata-babalarımızdıń bay miyrasın tereń ańlawda úlken áhmiyetke iye.
Oraydıń muzey kompleksi ekspoziciyası bir neshe tariyxıy zallardı óz ishine aladı. “Quranı kárim zalı,” “Islamǵa shekemgi civilizaciyalar,” “Birinshi Renessans,” “Ekinshi Renessans,” “Ózbek xanlıqları dáwiri,” “XX ásirde Ózbekstan,” “Jańa Ózbekstan – Jańa Renessans” sıyaqlı zallar, bahalı ekspoziciyalar, tariyxıy dárekler ustaz jazıwshı hám shayırlar, jurnalistler, ruwxıylıq úgit-násiyatlawshılarında úlken tásir qaldırdı.

Nazokat Usmonova, ÓzA