O‘zLiDeP Qaraqalpaqstan Respublikası Keńesiniń baslaması menen Qanlıkól rayonında jaylasqan ” KANTEX INVEST ” juwapkershiligi sheklengen jámiyetinde “Ózbekstan – 2030” strategiyasın keńnen úgit-násiyatlaw hám partiya qatarına jańadan qabıl etilgen aǵzalarǵa partiya gúwalıqların tapsırıw máresimi bolıp ótti.
Ilajda O‘zLiDeP Qaraqalpaqstan Respublikası Keńesiniń wákilleri, kárxana basshıları, jumısshı-qánigeler, jámiyetlik belsendileri hám partiya aǵzaları qatnastı.
Ilaj dawamında O‘zLiDeP Qaraqalpaqstan Respublikası Keńesi Hayal-qızlar mashqalaların úyreniw hám baslamaların qollap-quwatlaw bóliminiń baslıǵı Sh.Abdiramanova bayanat jasap, “Ózbekstan – 2030″ strategiyasınıń sociallıq xızmetler kórsetiw hám kámbaǵallıqtı qısqartıwǵa qaratılǵan reformaları, atap aytqanda, usı hújjette belgilengen 25-maqset sheńberinde ámelge asırılıwı tiyis wazıypalar boyınsha tolıq túsinikler berdi.
Sonday-aq, partiyanıń saylawaldı baǵdarlamasında belgilengen gender teńlikti támiyinlew siyasatı, hayal-qızlardıń jámiyetlik hám siyasiy partiyalardıń iskerligindegi qatnasın jáne de keńeytiw, olardıń jámiyetlik-siyasiy belsendiligin arttırıw arqalı basqarıw lawazımlarında hayal-qızlar úlesin 30 procentke jetkeriw maqsetleri ayrıqsha atap ótildi.
Ilaj qatnasıwshıları ” KANTEX INVEST ” JShJ jumısı menen de jaqınnan tanıstı. Atap aytqanda, kárxanada hayal-qızlardıń bántligin támiyinlew, olar ushın qáwipsiz hám qolaylı jumıs orınların jaratıw, islep shıǵarıw procesinde miynet qáwipsizligi talaplarına qatań ámel etiw, arnawlı jumıs kiyimleri hám zárúr texnikalıq qurallar menen támiyinlew, sonday-aq, jumısshı-qánigelerdiń kásiplik mamanlıǵın arttırıwǵa qaratılǵan jumıslar unamlı bahalandı.
Ilaj dawamında qatnasıwshılar ÓzLiDeP partiyasınıń tiykarǵı maqset hám wazıypaları, isbilermenlikti rawajlandırıw, xalıqtıń bántligin arttırıw hám social-ekonomikalıq reformalarda belsene qatnasıwǵa qaratılǵan programma ideyaları menen tolıq tanıstı. Partiya tárepinen alǵa qoyılıp atırǵan ámeliy baslamalar qatnasıwshılarda úlken qızıǵıwshılıq oyattı. Nátiyjede bul ideyalardı qollap-quwatlaw tilegin bildirgen puqaralar partiya qatarına qabıl etilip, olarǵa aǵzalıq gúwalıqları saltanatlı túrde tapsırıldı.
Bul ilaj “Ózbekstan – 2030” strategiyasında belgilengen tiykarǵı wazıypalardıń orınlanıwın támiyinlew, xalıqtıń siyasiy sanası hám belsendiligin arttırıw, ásirese, hayal-qızlardıń jámiyetlik turmıstaǵı ornın bekkemlewge xızmet etetuǵını menen áhmiyetli boldı.

Qaraqalpaqstan xabar agentligi