JICA Yaponiya xalıqaralıq birge islesiw agentliginiń grant baǵdarlaması sheńberinde zamanagóy xirurgiyalıq úskeneler alıp kelindi
Joybar sheńberinde institutqa alıp kelingen úskenelerdiń ulıwma bahası 2,1 million AQSh dolları bolıp, zamanagóy medicinanıń áhmiyetli baǵdarları boyınsha operaciya hám diagnostika ótkeriw ushın joqarı texnologiyalı medicinalıq xızmetlerde paydalanıladı.
Úskeneler quramalı medicinalıq aralasıwlardı joqarı anıqlıqta hám minimal jaraqatlılıqta ámelge asırıw imkaniyatın beretuǵın neyroendoskopiya, laparoskopiya (sonıń ishinde, balalar xirurgiyası ushın), endourologiya hám endoskopiyalıq LOR-xirurgiya sistemaların óz ishine aladı.
Bul joybardıń ámelge asırılıwı Qaraqalpaqstannıń densawlıqtı saqlaw sistemasınıń imkaniyatların kúsheytiwge járdem beredi. Minimal invaziv texnologiyalardan paydalanıw asqınıwlar qáwpin azaytıw, qan joǵaltıwdı azaytıw hám nawqaslardıń tikleniw múddetin qısqartıw imkaniyatın beredi.
Ásirese, awır hám qıstawlı patologiyalarǵa shalınǵan balalar hám nawqaslardı zamanagóy emlew usıllarınan paydalanıw imkaniyatın keńeytiw ayrıqsha áhmiyetke iye. Joybar xalıqaralıq emlew standartların engiziw, medicina xızmetkerleriniń mamanlıǵın arttırıw, nawqaslardı aymaqtan tısqarıǵa jiberiw zárúrligin azaytıw, orınlarda sapalı hám óz waqtında medicinalıq járdem kórsetiwge xızmet etedi.

Qaraqalpaqstan xabar agenligi