Máhellede awızbirshilikti saqlaw, jaslar tárbiyası hám toy-merekelerdi ısırapkershiliksiz ótkeriwde kóshe biyiniń atqaratuǵın xızmeti ayrıqsha. Sonlıqtan da olardıń jumısların jetilistiriwde sońǵı waqıtlarda bir qatar ilajlar jolǵa qoyılmaqta. «Eń úlgili kóshe biyi» tańlawınıń ótkeriliwi de olar arasında jumısların belsendilik penen alıp barıp atırǵan kóshe biylerin belgilep bermekte.
Taqıyatas rayonı hákimliginiń májilisler zalında máhálle turmısında belsendilik hám juwapkershilik penen jumıs alıp barıp atırǵan kóshe biylerine baǵıshlanǵan ilaj bolıp ótti. Ilajda Ózbekstan máhálleler awqamı Qaraqalpaqstan basqarmasınıń baslıǵı S.Turmanov, rayon hákiminiń orınbasarı U.Aytımbetov, tiyisli taraw juwapkerleri hám kóshe biyleri qatnastı.
Onda máhállelerde tınıshlıq hám tatıwlıqtı támiyinlew, xalıq penen tıǵız birge islesiwde sociallıq mashqalalardıń sheshimin tabıwda kóshe biyleriniń de ornı ayrıqsha ekenligi atap ótildi.
Ilajda tańlawdıń rayonlıq basqıshında 1-, 2- hám 3-orınlardı iyelegen kóshe biylerine 5 million sumnan aqshalay sıylıq tapsırıldı. Sonday-aq, 11 máhálleniń kóshe biyi 1 million sum aqshalay sıylıq penen xoshametlendi.

Qaraqalpaqstan xabar agentligi