Ózbekstan Respublikası Prezidenti Shavkat Mirziyoev “Rosatom” atom energiyası boyınsha mámleketlik korporaciyası bas direktorı Aleksey Lixachyovtı qabılladı.
Mámleketimizde integraciyalasqan atom elektr stanciyasın qurıw joybarın iske asırıwdıń ámeliy tárepleri, sonday-aq, atom energiyasınan tınıshlıq maqsetlerinde paydalanıw baǵdarındaǵı birge islesiwdi keńeytiw máseleleri dodalandı.
Ótken jıldıń oktyabr ayında birinshi az quwatlılıqtaǵı reaktor imaratı ushın tırnaq tasın qoyıw jumısları baslanǵanı qanaatlanıwshılıq penen atap ótildi. Elektr stanciyanı joybarlastırıw jumısları dawam etpekte.
Bunnan tısqarı, ótken jılı “MIFI” milliy izertlew yadro universitetiniń Tashkenttegi filialı negizinde atom energetikası hám yadro texnologiyaları boyınsha aldıńǵı injenerlik mektebi iske qosıldı.
Sonday-aq, awıl xojalıǵı hám medicinada yadro texnologiyaların qollanıw, tarawda maman kadrlardı tayarlaw, ilimdi rawajlandırıw hám sociallıq joybarlardı ámelge asırıw baǵdarında birge islesiwdi rawajlandırıwǵa ayrıqsha itibar qaratıldı.

ÓzA