Prezidentimiz náshebentlik jınayatshılıǵı hám shólkemlesken toparlarǵa qarsı gúresiw boyınsha náshebentlik kanallarınıń aqırǵı deregi hám qáwenderlerine shekem jetip barıw ushın juwapkerlerde isenim jetispey atırǵanın sınǵa aldı.
Paytaxtta narkojınayatlardıń sanı 4 mıńnan artqan. Qolǵa alınǵan 112 shólkemlesken jınayıy topar 1 mıń 300 den aslam jınayat islegen.
Bul jınayatlar ushın ayıplı dep tabılǵanlar jazasınıń yarımın da ótemesten azatlıqqa shıqpaqta. Aqıbetinde bul jınayattı qaytadan islegenler úsh jılda 125 procentke kóbeygen.
Prezident Administraciyası shuǵıllanıwdı baslaǵannan keyin bul máselede ózgeris bolǵanı atap ótildi. Sońǵı úsh ayda respublika boyınsha 50 ge shamalas iri narkotoparlar uslanıp, yarım tonna narkotikler aylanısına shek qoyıldı.
– Eń jamanı, sırt mámleketlerde de ózimizdiń puqaralar shólkemlesken toparlar dúzip, elimizden barǵanlarǵa aldawshılıq, zorlıq, isbilermenligine zıyan salıw menen shuǵıllanbaqta. Ózbeklerdiń sırt eldegi ǵalabalıq tártipsizlikler elimizdiń abırayına zıyan jetkermekte, – dedi mámleketimiz basshısı.
Ótken jıldıń ózinde sırt elde awır jaǵdayda qalǵan 3 mıń 700 puqaramız elimizge qaytarıldı. 192 puqara adam sawdası qurbanına aylandı.

ÓzA