Qaraqalpaqstan Respublikası Ministrler Keńesi Korrupciyaǵa qarsı ishki qadaǵalaw bóliminiń baslıǵı B.Matmuratovtıń qatnasıwında ushırasıw bolıp ótti. Onda mámleketlik uyımlardıń Korrupciyaǵa qarsı gúresiw hám “Komplaens-qadaǵalaw” bólimleriniń qánigeleri qatnasıp, jınayatshılıqqa qarsı gúresiw hám korrupciyalıq jaǵdaylardıń aldın alıw máseleleri dodalandı.
Atap ótilgenindey, 2025-jıl 26-dekabr kúni Prezidentimizdiń Oliy Majliske hám xalqımızǵa jollaǵan gezektegi Múrájatı mámleketimizdiń rawajlanıwında jańa basqıshtı baslap berdi. Onda jámiyet hám mámlekettiń rawajlanıwına tosqınlıq etip atırǵan mashqalalar ashıq hám sın kózqarastan talqılanıp, olardı saplastırıwǵa qaratılǵan anıq wazıypalar belgilendi.
Korrupciya tek ǵana ekonomikalıq ósiwge emes, al ádillik hám nızam ústinliginiń támiyinleniwine, puqaralardıń mámleketke bolǵan isenimine úlken zıyan jetkermekte. Sonlıqtan da, bul illetke qarsı gúresiwdi jańa basqıshqa alıp shıǵıw mámleketlik siyasattıń tiykarǵı baǵdarı sıpatında belgilendi.
Prezidentimiz bul máselede qatań poziciyasın bildirip, “Elimizde korrupciyaǵa qarsı gúresiw boyınsha 2026-jılı “ayrıqsha jaǵday” járiyalaymız”, dep atap ótti. Bul pikir mámleketlik basqarıwda ashıq-aydınlıqtı támiyinlew, juwapker shaxslardıń juwapkershiligin kúsheytiw hám korrupciyalıq jaǵdaylarǵa pútkilley mawasasız qatnastı qáliplestiriwge qaratılǵan áhmiyetli siyasiy erk-ıqrardıń ayqın kórinisi bolıp esaplanadı.
Múrájatta belgilengen wazıypalardı orınlawda, korrupciyaǵa qarsı gúresiwde barlıq mámleketlik uyımlardıń, jámiyetlik institutlar menen puqaralardıń belsene qatnasıwın talap etedi. Nızam ústinligin bekkemlew, mámleketlik xızmetlerdi sanlastırıw, ashıq-aydınlıqtı keńeytiw arqalı bul illetke shek qoyılıwı múmkin.
Prezidentimizdiń Múrájatında alǵa qoyılǵan ideyalar hám baslamalar mámleketimizde korrupciyadan jıraq ortalıqtı qáliplestiriw, ádalatlı jámiyet qurıw hám turaqlı rawajlanıwǵa erisiwde áhmiyetli baǵdar bolıp xızmet etedi.
Ushırasıwda pikir-usınıslar bildirilip, qatnasıwshılar ózlerin qızıqtırǵan sorawlarǵa juwap aldı.

Qaraqalpaqstan xabar agentligi