Bajıxana xızmeti mámleketimiz ishki hám sırtqı siyasatınıń ajıralmas bólegi, elimizdiń ekonomikalıq qáwipsizligin bekkemlew, milliy máplerin qorǵawdıń áhmiyetli hám nátiyjeli mexanizmi bolıp esaplanadı. Ásirese, búgin jedel pátler menen rawajlanıp atırǵan sırtqı ekonomikalıq baylanıslar sharayatında bajıxana uyımlarınıń ornı hám áhmiyeti barǵan sayın artıp barmaqta. Sonıń ushın da taraw xızmetkerleriniń mashaqatlı, sonıń menen birge maqtanıshlı xızmeti hámiyshe qádirlenedi.
Paytaxtımızda 26-yanvar – Ózbekstan Respublikası Mámleketlik bajıxana xızmeti uyımları xızmetkerleri kúni múnásibeti menen shólkemlestirilgen saltanatlı bayram ilajında usı taraw belsendileri hám veteranlarınıń miynetleri jáne bir márte tán alındı.
Ózbekstan Respublikası Prezidenti Administraciyası, Ministrler Kabinetiniń wákilleri, senatorlar, deputatlar, taraw belsendileri, tiyisli ministrlikler menen uyımlardıń basshıları qatnasqan bul ilajda dáslep mámleketimizdiń gimni jańladı.
Bunnan soń Ózbekstan Respublikası Prezidenti Shavkat Mirziyoevtiń Ózbekstan bajıxana tarawı xızmetkerlerine qutlıqlawın Ózbekstan Respublikası Prezidenti Administraciyası Kommunikaciyalar departamentiniń basshısı – Ózbekstan Respublikası Prezidentiniń baspasóz xatkeri Sherzod Asadov oqıp esittirdi.
Qutlıqlawda atap ótilgenindey, ǵárezsizlik jıllarında bajıxana uyımları mámleketimizdiń ekonomikalıq qáwipsizligin támiyinlew, milliy máplerimizdi qorǵaw hám shegaralarımızdıń qol qatılmaslıǵın saqlawda mámlekettiń isenimli tayanıshı bolıp kelmekte. Atap aytqanda, Jańa Ózbekstan sharayatında bajıxana uyımları zamanagóy, ashıq hám nátiyjeli sistemaǵa aylanıp, elimizdiń rawajlanıwına múnásip úles qospaqta.
Tarawdaǵı túpkilikli reformalar sebepli keyingi jıllarda bajıxana rásmiylestiriwi waqtı qısqartıldı, deklaraciyalardıń 20 procenti insan faktorısız ámelge asırılmaqta. Ótken jılı 76,2 trillion sum bajıxana tólemleri óndirilip, bul kórsetkish 21 procentke arttı hám onıń mámleketlik byudjet dáramatlarındaǵı úlesi 25 procentke jetti.
Taraw xızmetkerleri tárepinen tovarlardıń nızamsız aylanısına shek qoyıw, qáwip-qáterlerdi aldınnan tallaw, tovarlardı rásmiy importqa tartıw baǵdarında da úlken jumıslar ámelge asırıldı. Iri muǵdardaǵı náshebentlik, psixotrop hám kúshli tásir etetuǵın elementlerdiń nızamsız aylanısına shek qoyılıwında da olardıń úlesi úlken.
– Mámleketimiz basshısınıń bajıxana tarawı xızmetkerlerine jollaǵan qutlıqlawın dıqqat penen tıńladıq, – deydi Ózbekstan Respublikası Ekonomika hám qarjı ministrligi janındaǵı Bajıxana komitetiniń baslıǵı Akmalxwja Mavlonov. – Onda bajıxana sistemasınıń turmısımızdaǵı ornına joqarı baha beriliwi menen birge, keleshekte bul tarawdı bunnan bılay da rawajlandırıw, materiallıq-texnikalıq bazasın bekkemlew, pidákerlik penen xızmet etip atırǵan xızmetkerlerdi qollap-quwatlaw baǵdarındaǵı jumıslardı sistemalı dawam ettiriw zárúrligi atap ótildi. Bulardıń barlıǵı bizge maqtanısh baǵıshlaw menen birge, jumısımızdaǵı juwapkershilikti jáne de arttırıwǵa túrtki berdi. Aldımızǵa qoyılǵan tiykarǵı wazıypalardı nátiyjeli orınlaw ushın bunnan bılay da bar bilim hám potencialımızdı, tájiriybemizdi, imkaniyatlarımızdı jumsaymız.
Ilajda atap ótilgenindey, Jańa Ózbekstan sharayatında bajıxana sistemasın reformalaw, onı zamanagóy talaplar hám aldınǵı sırt el tájiriybeleri tiykarında jetilistirip barıw mámleketimiz siyasatınıń áhmiyetli baǵdarlarınan birine aylanbaqta. Mámleketimiz basshısınıń baslaması menen ámelge asırılıp atırǵan keń kólemli reformalar sheńberinde bajıxana uyımlarınıń jumısı pútkilley modernizaciyalanbaqta. Ásirese, sońǵı jılları tarawda xalıqaralıq standartlarǵa beyimlestirilgen tártip-qaǵıydalar engizilgeni, elektron deklaraciyalaw hám qáwip-qáterlerdi basqarıw sistemaları hám basqa da bir qatar jańa zamanagóy baǵdarlama hám texnologiyalardıń ámeliyatqa engizilgeni maqsetke muwapıq bolmaqta. Bular bajıxana qadaǵalawı hám rásmiylestiriwinde insan faktorın azaytıwǵa, ashıq-aydınlıqtı arttırıwǵa, tiykarǵısı, isbilermenlerge sırtqı sawda jumısı menen erkin shuǵıllanıw imkaniyatın jaratıwǵa xızmet etip atır.
Komitettiń bergen maǵlıwmatlarǵa bola, ótken tórt jıldıń ózinde respublikamızdıń tovarlar sırtqı sawda aylanısı 68 procentke artıp, 2025-jıldıń juwmaǵı boyınsha 55 mlrd. 412 mln. dollardı quraǵan. Tarawdaǵı reformalar sebepli iri shegara ótkeriw punktlerinde júk avtotransportlarınıń kúnlik ortasha ótkeriwsheńligi 1,5 mıńnan 3,3 mıńǵa jetti. Eksporttı ápiwayılastırıw maqsetinde “Eksport úsh qádemde” baǵdarlaması iske qosılıp, 9 basqıshlı tártipti 3 esege qısqartıwǵa, tiykarǵısı, ótken jılı 30 mıńǵa shamalas sırtqı ekonomikalıq jumıs qatnasıwshılarınıń artıqsha qárejeti hám waqtınıń únemleniwine erisildi.
Usı jerde, qurılıs hám rekonstrukciya jumısları ámelge asırılǵan bajıxana obektleri de az emes. Qaraqalpaqstan Respublikası basqarması, “Tashkent-AERO” kompleksi hám Milliy kinologiya orayınıń hákimshilik imaratları tolıq rekonstrukciyalandı. On shegara postı tolıq ońlandı. Quwanıshlı tárepi, Xorezm hám Ferǵana wálayatları xızmetkerleri ushın 85 kvartiralı eki xızmet úyi paydalanıwǵa tapsırıldı.
Házirgi waqıtta Qazaqstan menen shegaradaǵı eń iri postlardan biri – “Ǵishtkwprik” postı da zaman talapları tiykarında qayta qurılıp, paydalanıwǵa tayar halǵa keltirildi. Pútkilley jańa kóriniste qurılǵan bul post endi kúnine 1,5 mıńnan aslam avtotransport hám 50 mıńnan aslam jolawshını arqayın ótkere aladı.
Sanlastırıw baǵdarındaǵı jańalanıwlar nátiyjesinde alpısqa shamalas bajıxana postlarınıń jumısı optimallastırılıp, olarda normal jumıs rejimi engizildi. Sanlastırıw tarawında erisilip atırǵan jetiskenlikler nátiyjesinde sanlı transformaciya reytinginde Bajıxana komiteti mámleketlik uyımlar arasında úsh jıldan berli 1-orındı ielep kelmekte.
Mámleketimiz basshısı belgilep bergen wazıypalardıń orınlanıwı sheńberinde bajıxana uyımları xalıqtıń dárti menen jasaytuǵın, oǵan biyǵárez xızmet etetuǵın, jergilikli kárxanalar, isbilermenler menen tıǵız islep, olarǵa barlıq ámeliy járdemlerdi kórsetetuǵın sistema sıpatında da qáliplesti. Bul baǵdarda sistema uyımlarınıń qatnasıwında ótken tórt jılda otızdan aslam obektte qurılıs hám rekonstrukciya jumısları ámelge asırıldı. Bir neshe ulıwma bilim beriw mektepleri, sport kompleksleri, “Saqawat” hám “Múriwbet” úyleri, balalar baqshaları paydalanıwǵa tapsırıldı.
Xalıqtıń turmıs sharayatın jáne de jaqsılaw maqsetinde qabıl etilgen “Kámbaǵallıqtan abadanlıqqa qaray” baǵdarlaması hám aymaqlardıń gúzgi-qısqı máwsimge tayarlıq jumıslarına ámeliy járdem kórsetiw baǵdarlarında Samarqand, Sırdárya, Qashqadárya, Ferǵana hám Xorezm wálayatları jáne Tashkent qalasındaǵı jámi 2 mıńǵa shamalas máhállelerde anıqlanǵan mashqalalardı saplastırıwda bajıxana xızmetkerleri belsene qatnastı.
Saltanatlı ilajda taraw pidayılarınıń qatnasıwında Watanımızdıń rawajlanıwı jolında ámelge asırılıp atırǵan áne usınday artqa qaytpaytuǵın reformalar atap ótildi.
Ilajda, sonday-aq, sistema xızmetkerleri arasında ótkerilgen tańlaw sheńberinde “Eń jaqsı aymaqlıq bajıxana uyımı baslıǵı”, “Eń jaqsı sorastırıwshı xızmetker”, “Eń jaqsı jas kinolog” sıyaqlı onnan aslam nominaciyalardıń jeńimpazları sıylıqlandı.
Usınılǵan bayram koncert baǵdarlaması bolsa qatnasıwshılarda úlken tásir qaldırdı.

Qaraqalpaqstan xabar agentligi