“Máhállelerdi rawajlandırıw hám jámiyetti rawajlandırıw jılı”nda tiykarǵı baǵdarlar boyınsha reformalar baǵdarlamaları hám “Ózbekstan – 2030” strategiyasın ámelge asırıw boyınsha Mámleketlik baǵdarlama haqqında”ǵı Prezident pármanınıń joybarı jámiyetshiliktiń dodalawına qoyıldı.
Mámleketlik baǵdarlama joybarında korrupciyaǵa qarsı gúresiw baǵdarında qanday wazıypalar belgilenbekte?
Eń tiykarǵı sociallıq qatnasıqlardı tártipke salatuǵın 2 mıńnan aslam nızamshılıq hújjetleri xatlawdan ótkerilip, olardaǵı kolliziyalar, sáykes kelmewshilikler, “anıq emes” qaǵıydalar hám basqa da korrupciyanı keltirip shıǵaratuǵın faktorlar saplastırıladı.
Mámleketlik uyımlar basshılarınıń ózi basshılıq etip atırǵan uyım yamasa sistema jumısında jol qoyılǵan úlken qáte hám kemshilikler ushın siyasiy juwapkershilik institutın engiziw boyınsha normativlik-huqıqıy hújjet joybarı islep shıǵıladı.
Joybarda siyasiy lawazımlardı iyelegen mámleketlik xızmetkerlerdiń xalıq aldında juwapkershiligi, olarǵa isenimsizlik bildiriw tiykarları hám tártibi, olardıń óz qálewi menen otstavkaǵa shıǵıw tártibi názerde tutıladı.
Mámleketlik uyımda miynet shártnaması toqtatılǵan yamasa xızmetten bosatılǵan xızmetkerdi eki jıl ishinde ózi tikkeley yamasa tikkeley emes qadaǵalawdı ámelge asırǵan shólkemlerge jumısqa qabıl etiwde korrupciyaǵa qarsı ishki qadaǵalaw strukturasınan juwmaq alıwdıń anıq tártibin belgilew boyınsha uyımlıq normativlik-huqıqıy hújjet joybarı islep shıǵıladı.
Korrupciyaǵa qarsı gúresiw agentliginiń rásmiy veb-saytı hám “E-anticor” ashıq platformasında mápler soqlıǵısıwı hám korrupciyanıń aldın alıwǵa baylanıslı nızamshılıqtaǵı sheklewler boyınsha júzege kelgen mashqalalı jaǵdaylarda real waqıt rejiminde másláhátler beriwshi “Konsultant” interaktiv xızmeti (chat-bot) moduli islep shıǵıladı.
Respublikalıq atqarıwshı hákimiyat uyımlarınıń rayon (qala)lıq bólimleri basshıların rotaciyalaw tártibi boyınsha qarar joybarı islep shıǵıladı.
Joybarda rotaciyalanatuǵın lawazımlardıń dizimin tastıyıqlaw, rotaciyalaw tiykarları hám tártibi, rotaciyalawda qosımsha sociallıq-huqıqıy kepilliklerdi támiyinlew sáwlelendiriledi.
“Korrupciyaǵa qarsı gúresiw virtual akademiyası” elektron platformasında 30 mıń mámleketlik xızmetker korrupciyaǵa qarsı gúresiw boyınsha oqıtıladı.
Oqıtıw processlerine xalıqaralıq ekspertlerdi tartıw, oqıw-metodikalıq qollanbalar hám oqıw baǵdarlamaların jetilistiriw, oqıtıw nátiyjelerin monitoring etken halda mámleketlik xızmetkerlerdi belgilengen múddette oqıtıw boyınsha májbúriy talaplarǵa ámel etpegen shólkemlerge usınıs kirgiziledi.
Satıp alıw tártip-qaǵıydaları qatnasıwshıları hám olardıń affillengen shaxslarınıń bir lotta qatnasıwınıń aldın alıwǵa baylanıslı normativlik-huqıqıy hújjet joybarı islep shıǵıladı.
Onda satıp alıw tártip-qaǵıydaları qatnasıwshıları hám olardıń affillengen shaxsları, sonıń ishinde, birdey shólkemlestiriwshiler, basshılar, beneficiarlar yamasa óz-ara baylanıslı isbilermenlik subektleriniń bir lotta qatnasıwın sheklewshi normalar belgilenedi.
Satıp alıw tártip-qaǵıydalarında affillengen shaxslardıń qatnasıwın qadaǵalaw mexanizmlerin engiziw, sonıń ishinde, avtomat tekseriw hám qáwip indikatorların islep shıǵıw arqalı báseki kúsheytiledi.
Birden-bir interaktiv mámleketlik xızmetler portalındaǵı xızmetler hám servislerdiń sanın 880 ge jetkeriw, sonday-aq, portaldıń qolaylıqların ǵalaba xabar quralları hám basqa da usıllar arqalı úgit-násiyatlaw, “Open Data Challange” xakatonın ótkeriw sıyaqlı ilajlar belgilenbekte.

N.Abduraimova,
ÓzA