Awıl xojalıǵı ministrligi tárepinen hákimlikler menen birgelikte Xorezm wálayatı hám Qaraqalpaqstan Respublikasında suwǵarılatuǵın jer maydanlarında quwraǵan shóplerden, ósimliklerdiń japıraqlarınan hám basqa da organikalıq qaldıqlardan paydalanǵan halda tábiyǵıy tóginlerdi tayarlaw boyınsha oqıw-ámeliy seminarlar ótkerilmekte.
Seminarlar dawamında organikalıq shıǵındılardı órtep jibermey, olardı arnawlı uralarǵa jıynaw hám qayta islew arqalı topıraqtıń ónimdarlıǵın arttırıwǵa qaratılǵan nátiyjeli usıllar kórsetilmekte.
Gezektegi seminar Taqıyatas rayonındaǵı Naymankól awıl puqaralar jıyınında ótkerildi.
Oǵan Awıl xojalıǵı ministrliginiń basshıları, tiyisli qánigeleri, ilimpazlar hám tájiriybeli qánigeler, fermerler qatnasıp, tábiyǵıy tóginlerdiń jerdiń ónimdarlılıǵı hám zúráátliligine tásiri haqqında maǵlıwmatlar berildi.
Maqset – awıl xojalıǵında ekologiyalıq kózqaraslardı keńeytiw hám óndiris nátiyjeliligin arttırıw.
Seminarda quwraǵan shóplerdiń, ósimliklerdiń japıraqların, hár qıylı awıl xojalıǵı ónimleriniń qaldıqların órtep jibermey, arnawlı shuqırlarǵa jıynaw hám qayta islew arqalı tábiyǵıy tóginlerdi tayarlaw processleri kórsetildi.
Atap ótilgenindey, bul usıl qorshaǵan ortalıqqa zıyan keltirmey topıraqtıń ónimdarlıǵın arttırıw, organikalıq elementlerge bay tóginlerdi alıw hám ekologiyalıq turaqlılıqtı támiyinlewde úlken áhmiyetke iye.
Sonday-aq, ilajda usı texnologiya arqalı hawaǵa zıyanlı zatlardıń shıǵarılıwınıń aldın alıw, awıl xojalıǵında “jasıl texnologiyalar”dı keńnen engiziw imkaniyatları haqqında túsinikler berilip, qatnasıwshılar ózlerin qızıqtırǵan sorawlarǵa juwap aldı.
Maǵlıwmat ushın, usı jıldıń 26-yanvar – 3-fevral kúnleri belgilengen grafik tiykarında respublikamızdıń barlıq aymaqlarında tábiyǵıy tóginlerdi tayarlaw boyınsha oqıw-ámeliy seminarları ótkeriliwi belgilengen.

Á.Jiyemuratov,
Qaraqalpaqstan xabar agentligi