Dizimge alıw sorawnamasın qáte yamasa tolıq bolmaǵan halda toltırǵan puqaralar ushın avtomatikalıq eskertiw sisteması engizildi. Bul haqqında xalıq hám awıl xojalıǵın dizimge alıw ilajınıń rásmiy betinde málim etildi.
Atap ótiliwinshe, ayırım jaǵdaylarda sorawnama tek ǵana bir shaxs atınan toltırılıp, onıń menen bir kvartirada jasaytuǵın basqa aǵzalar kirgizilmey atır. Esletip ótiliwinshe, tuwısqanlıq dárejesine qaramastan, bir shańaraqta jasaytuǵın barlıq shaxslar birgelikte dizimge alınıwı shárt.
Sonday-aq, jer maydanları, jetistirilip atırǵan ónimler, qaramal hám quslardıń sanı tolıq kórsetilmew jaǵdayları da anıqlanbaqta. Bunday kemshilikler málimleme sisteması arqalı tekserilip, sorawnamanı qayta toltırıw ushın jiberiledi.
Onlayn dizimnen ótip, sertifikat alǵan puqaralarǵa platformaǵa qayta kirip, sertifikat aynasındaǵı eskertiwlerdi tekseriw hám qáte bolsa, sorawnamanı qayta toltırıw usınıs etildi, – dep málimleme beredi xabar.uz saytı.

Qaraqalpaqstan xabar agentligi