Ózbekstan Respublikası Prezidenti Shavkat Mirziyoev Aziya Olimpiada keńesiniń basshılıǵı hám shólkem Bas assambleyasınıń qatnasıwshıların qabılladı.
Ushırasıw aldınan Aziya Olimpiada keńesiniń jańadan saylanǵan prezidenti Shayx Javon bin Hamad Ol Soniy mámleketimiz basshısına Qatar Ámiri Shayx Tamim bin Hamad Ol Soniydiń qızǵın sálemi hám eń jaqsı tileklerin jetkerdi.
Mámleketimiz jetekshisi Ózbekstanǵa xalıqaralıq sport háreketiniń isenimli sherigi sıpatında joqarı isenim bildirilip, shólkem assambleyasın Tashkentte ótkeriwge qarar etilgeni ushın minnetdarshılıq bildirdi.
Sporttı rawajlandırıw “Ózbekstan – 2030” strategiyası sheńberinde tiykarǵı baǵdarlardan biri sıpatında belgilengeni atap ótildi.
Ózbekstan xalıqaralıq sport shólkemleri menen birge islesiwdi jáne de bekkemlew hám ámeliy nátiyjelerge erisiwge qaratılǵan birgeliktegi baǵdarlama hám baslamalardı ámelge asırıwǵa tayar ekeni atap ótildi.
Ilaj juwmaǵında Prezidentimiz sporttı rawajlandırıw hám sport tarawındaǵı xalıqaralıq birge islesiwdi bekkemlewge qosqan úlken úlesi ushın Aziya Olimpiada keńesiniń bas direktorı, Pútkil jer júzilik suw sportı federaciyasınıń prezidenti Husayn al-Musallamǵa Ózbekstan Respublikasınıń joqarı mámleketlik sıylıǵı – “Dwstlik” ordenin tapsırdı.

ÓzA