Paytaxtımızdaǵı Xalıqaralıq kongress orayında Aziya Olimpiada keńesiniń 46-Bas Assambleyasınıń májilisi bolıp ótpekte.
Ánjumannıń ashılıw máresiminde qatnasqan Pútkil jer júzilik júziw federaciyasınıń (World Aquatics) baslıǵı, Aziya Olimpiada keńesiniń Bas direktorı Husayn Al Musallam 46-Bas Assambleya májilisinde qatnasıp atırǵan kontinent mámleketleri sport shólkemleriniń wákillerin, delegatlardı qutlıqlap, Ózbekstanda usı tariyxıy májilistiń shólkemlestirilip atırǵanı dúnya júzilik áhmiyetke iye ekenin bildirdi.
Bunnan soń Xalıqaralıq antidoping shólkemi (WADA) prezidenti Vitold Banka, “Harbin-2024” IX Qısqı Aziya oyınları boyınsha vice-prezidenti, AOK Sport máseleleri komitetiniń baslıǵı hám bir qatar mámleketlerdiń Olimpiada komiteti basshılarınıń esabatları tıńlandı.
— Keyingi 2-3 jıl aralıǵında Ózbekstanda xalıqaralıq áhmiyettegi ilajlar turaqlı ótkerilmekte. Aziya Olimpiada keńesiniń tariyxıy 46-Bas Assambleyası hám onıń sheńberindegi ilajlar sebepli jáne bul gózzal hám biytákirar mámleketke barǵanımnan oǵada quwanıshlıman. Tashkentte Aziya Olimpiada keńesiniń jańa prezidentiniń saylanıwı tek ǵana kontinent emes, al dúnya sportı, Olimpiada háreketiniń rawajlanıwında úlken áhmiyetke iye, – deydi Assambleya májilisine qatnasıp atırǵan Xalıqaralıq awır atletika federaciyasınıń prezidenti Muhammad Jolud.
Kongress qatnasıwshılarına Xalıqaralıq olimpiada komitetiniń prezidenti Kirsti Koventri onlayn tárizde qutlıqlaw jollap, Tashkent ánjumanı tek ǵana Aziyada emes, al jáhán olimpiada háreketiniń áhmiyetli rawajlanıw basqıshın baslap beriwi menen ayrıqsha ekenin atap ótti. Turaqlı sóylesiw, jıllı qatnasıqlar tınıshlıq, doslıq tımsalı bolǵan sport háreketin, olimpiada ideyaların xalıqaralıq maydanda jáne de keńnen en jaydırıwǵa xızmet etetuǵını menen áhmiyetli ekenin aytıp ótti.
Konferenciya óz jumısın dawam ettirmekte.

ÓzA