Belgili bir xalıqtıń ózligi, milliyligi, ózine tánligi, tákirarlanbaslıǵı, tariyxı hám dástúrleri onıń milliy qádiriyatlarında sáwlelenedi. Respublikalıq Ruwxıylıq hám aǵartıwshılıq orayı tárepinen ózbek, rus hám inglis tillerindegi “Milliy qádiriyatlar atlası” tayarlanıp, basıp shıǵarıldı.
“Milliy qádiriyatlar atlası”nda Ózbekstan aymaǵında qáliplesken milliy qádiriyatlar, ruwxıy-aǵartıwshılıq miyras hám olardıń tariyxıy tamırları keń hám sistemalı túrde sáwlelendirilgen.
Ózbekstan adamzat civilizaciyasınıń rawajlanıwında áhmiyetli orın tutqan áyyemgi mákan sıpatında talqılanıp, Sırdárya hám Ámiwdárya basseynlerinde júzege kelgen otırıqshı turmıs, diyqanshılıq mádeniyatı hám ortasha klimat milliy oy-pikir hám qádiriyatlardıń qáliplesiwine kúshli tásir kórsetken. Ullı Jipek jolı arqalı túrli mádeniyatlar, ilimiy hám ruwxıy jetiskenliklerdiń óz-ara almasıwı keńpeyillik, ashıq-aydınlıq hám adamgershilik pazıyletlerin bekkemlegeni atap ótiledi.
Kitapta zardushtiylik, buddizm hám islam tálimatlarınıń úylesiwi, diniy hám dúnyalıq kózqaraslardıń óz-ara bayıtıwshı ózgesheligi nátiyjesinde Oraylıq Aziyada joqarı ilimiy-mádeniy ortalıq qálipleskeni kórsetip beriledi.
“Avesto” mádeniyatı, áyyemgi túrkiy jazıwlar, xalıq awızeki dóretiwshiligi úlgileri, sonday-aq, ilimpazlardıń miyrası milliy qádiriyatlardıń tiykarǵı derekleri sıpatında tallanadı. Ámir Temur hám temuriyler dáwirinde ilim, mádeniyat hám islam qádiriyatlarınıń rawajlanıwı ayrıqsha tán alınadı.
Sonday-aq, millet hám milliy qádiriyatlar arasındaǵı óz-ara baylanıslılıq, olardıń etnikalıq mákan, til, tariyxıy yad hám genofond penen tıǵız baylanıslılıǵı ashıp beriledi.
Ózbek xalqına tán úrp-ádetler, shańaraq hám jámiyettegi ádep-ikramlılıq normaları milliy qádiriyatlardıń ámeliy kórinisi sıpatında talqılanadı.
Ulıwma alǵanda, bul kitap-albom milliy qádiriyatlardıń tariyxıy úzliksizligi, miyrasxorlıǵı hám búgingi jámiyettiń rawajlanıwındaǵı áhmiyetin sáwlelendiriwge xızmet etedi.

N.Usmonova,
ÓzA