Jámiyette ruwxıy ortalıqtı bekkemlewde, insan qálbi hám sanasına unamlı tásir etiwde kórkem ónerdiń, atap aytqanda, kinonıń áhmiyeti ayrıqsha. Kino tek ǵana kewilashar qural emes, al jámiyetti tárbiyalawshı, áhmiyetli sociallıq hám ruwxıy ideyalardı úgit-násiyatlawshı kúshli mádeniy platformalardan biri bolıp esaplanadı.
Sońǵı jılları Respublikalıq Ruwxıylıq hám aǵartıwshılıq orayı tárepinen ruwxıy úgit-násiyatlawdıń zamanagóy hám nátiyjeli túrleri, atap aytqanda, sociallıq rolikler hám kinolar jaratıwǵa ayrıqsha itibar qaratılmaqta. Ótken jıldan baslap oraydıń jumısında kino ónimleri arqalı keń jámiyetshilikke sociallıq máselelerdi kórkem óner quralında sáwlelendiriw tiykarǵı baǵdarlardan birine aylanǵan.
Usı mániste, Ózbekstan Milliy kino kórkem óneri sarayında bolıp ótken “Fonus” atlı qısqa metrajlı filmler toplamınıń prezentaciyası da óziniń áhmiyetliligi menen ajıralıp turadı.
Respublikalıq Ruwxıy-aǵartıwshılıq orayı baslıǵınıń birinshi orınbasarı Batu Alimov keyingi jıllarda oray tárepinen alıp barılıp atırǵan jumıslar, jańa joybarlardıń áhmiyetine tolıq toqtap ótti.
Ilaj dawamında tamashagóylerge tórt qısqa metrajlı film usınıldı. Bular – “Fonus”, “Shegara”, “Qońsılar” hám “Iyshan qala” filmleri. Bas rejissyor – Shokir Xoliqov.
Bul filmler arqalı jámiyetlik turmısta áhmiyetli bolǵan tilekleslik, insan qádiri, milletleraralıq tatıwlıq, ilim-aǵartıwshılıq sıyaqlı ideyalar kórkem obrazlar arqalı sáwlelendirilgen. Hár bir film tamashagóydi biypárwa qaldırmaytuǵın turmıslıq waqıyalar tiykarında jaratılǵan bolıp, jámiyettegi mashqalalar hám qádiriyatlardı tereńirek ańlawǵa shaqıradı.
“Fonus” filminde shetki awılda mektepti atızǵa almastırıwǵa májbúr bolǵan oqıwshıların ilim dúnyasına, bilimlendiriwge alıp kiriwde tosqınlıqlarǵa ushıraǵan pidayı ustazdıń ómiri, onıń pútkil awılǵa bilim taratıw procesindegi waqıyalar súwretlengen.
“Shegara” filminde insan táǵdiri jámiyettegi ózgerisler menen qanshelli baylanıslı ekeni, insan baxtı geyde bizge sezilmeytuǵın ózgerislerde jasaytuǵını sáwlelendirilgen. Bul kartinada qońsı mámleketler menen shegaralardıń ashılıwı, bárinen burın, insan baxtı, qádirin joqarıǵa kótergeni sáwlelendirilgen.
Búgin jańa Oraylıq Aziya mámleketleriniń óz-ara integraciyası máseleleri xalıqaralıq jámiyetshiliktiń dıqqat orayında bolmaqta. “Qońsılar” filmi arqalı tuwısqan xalıqlar menen ázeliy dos, tilekles, awızbirshilikli ekenimiz turmıslıq hám tásirsheń kórinisler, qızǵınlıq penen ashıp berilgen.
Ózine tán formatta jaratılǵan bul filmler tamashagóylerge unadı.

N.Usmonova, ÓzA