Prezident Shavkat Mirziyoevtiń basshılıǵında kámbaǵallıqtı qısqartıw hám xalıqtıń bántligin támiyinlew boyınsha 2026-jıldaǵı tiykarǵı wazıypalar boyınsha videoselektor májilisi bolıp ótpekte.
Prezidentimiz bar imkaniyatlardı iske qosıw boyınsha hákimler hám “máhálle jetiligi”ne metodikalıq bilim hám tájiriybe jetispey atırǵanı, juwapker ministrlikler hám uyımlar bolsa olarǵa járdemlespey atırǵanın kórsetip ótti.
Arnasayda sharwashılıq, Shwrchida banan jetistiriw, Quvada ánar jetistiriw, Bostanlıqta pal hárreshilik boyınsha xalıq hám isbilermenler jaratqan tájiriybeler usınday qánigelesken basqa da rayonlar ushın jaqsı úlgi bola alıwı múmkin ekeni, biraq bunnan ónimli paydalanılmay atırǵanı atap ótildi.
– Bunday tájiriybeler hámme jerde bar. Biraq olardı úyretip, qamtıp alıwın keńeytetuǵın sistema joq! – dedi mámleketimiz basshısı.
Juwapkerlerge bir ayda jumıssızlıq hám kámbaǵallıq joqarı máhállelerdegi imkaniyatlardı úyrenip, olarǵa eń jaqsı tájiriybelerdi alıp kiriw boyınsha “metodikalıq qollanba” etip beriw tapsırıldı. Hákimler bolsa orınlarda bunıń orınlanıwın shólkemlestirip, adamlardı jumıslı etiw, dáramatın kóbeytiw, olardı qıynap atırǵan máselelerge sheshim tabıwǵa juwapker boladı.
– Ulıwma, bıyıl hár bir ministrlik hám hákimliktiń jumısı máhálle menen baylanıstırıladı, qabıl etiletuǵın qararlar da máhállede ne ózgeretuǵını názerde tutıladı, – dedi Prezidentimiz.
1 million xalıqtı turaqlı jumıs penen támiyinlew, 181 mıń shańaraqtı kámbaǵallıqtan shıǵarıw, kámbaǵallıqtan jıraq máhállelerdiń sanın 2,5 esege arttırıp, 3,5 mıńǵa jetkeriw, jumıssızlıq hám kámbaǵallıqtı 4,5 procentke túsiriw bıyılǵı jılǵa wazıypa etip belgilendi.

ÓzA