Prezident Shavkat Mirziyoevtiń basshılıǵında kámbaǵallıqtı qısqartıw hám xalıqtıń bántligin támiyinlew boyınsha 2026-jıldaǵı tiykarǵı wazıypalar boyınsha videoselektor májilisi baslandı.
Mámleketimiz basshısı kún tártibindegi máselelerge ótiwden aldın 2025-jıldıń juwmaqlarına qısqasha toqtap ótti.
Ótken jılı ekonomikamız dáslepki prognozǵa salıstırǵanda ádewir joqarı, yaǵnıy 7,7 procentke ósip, jalpı ishki ónim kólemi 147 milliard dollardan artqanı atap ótildi.
Ekonomikanıń barlıq tarmaqlarında ósiw pátleri 2024-jıldaǵıdan joqarı boldı. Tartılǵan sırt el investiciyaları 43 milliard dollarǵa, eksport kólemi 33,8 milliard dollarǵa jetti.
Joqarı ekonomikalıq belsendilik, ósip atırǵan tutınıw talabına qaramastan, inflyaciya dárejesi 2024-jıldaǵı 9,8 procentten 7,3 procentke tómenledi.
– Ne ushın bul sanlardı aytıp atırman? Sebebi ekonomikalıq ósiw qanshelli turaqlı bolsa, infrastrukturanı jaqsılawǵa kóbirek qarjı ketedi. Bul aqır-ayaǵında bántlik, dáramat hám turmıs abadanlıǵın arttırıwǵa xızmet etedi, – dedi Prezidentimiz.

ÓzA