Ózbekstanda ilimiy-izertlew jumısın jańa basqıshqa alıp shıǵıwǵa qaratılǵan áhmiyetli baslama ámelge asırılmaqta. Innovaciyalıq rawajlanıw agentligi tárepinen mámlekettegi ilimiy laboratoriyalar hám izertlew infrastrukturaları ushın jasalma intellektke tiykarlanǵan birden-bir ilimiy platforma islep shıǵılmaqta.
Bul platforma respublika boyınsha barlıq ilimiy-izertlew infrastrukturaları haqqındaǵı maǵlıwmatlardı birden-bir oraylasqan málimleme resursında jámlep, olardı nátiyjeli basqarıw imkaniyatın jaratadı. Bul arqalı ilimiy shólkemler arasında informaciyalıq almasıw ápiwayılasıp, ilimiy resurslardan paydalanıw dárejesi arttırıladı.
Platforma sheńberinde jasalma intellekt texnologiyaları járdeminde ilimiy infrastrukturalardan paydalanıw nátiyjeliligin prognozlaw hám optimallastırıwǵa baylanıslı tallawlar ámelge asırıladı. Bul bolsa ilim hám innovaciyalıq jumıs penen shuǵıllanıwshı shólkemler ushın waqıt hám materiallıq resurslardı únemlew imkaniyatın beredi.
Sonday-aq, jańa sistema tarawda ashıq-aydınlıqtı támiyinlew, ilimiy mákemeler arasında birge islesiw baylanısların bekkemlewge xızmet etiwi kútilmekte.
Qánigelerdiń atap ótiwinshe, platforma ilimiy izleniwlerdiń sapasın arttırıw, qayta qárejetlerdi azaytıw jáne respublikanıń túrli aymaqlarında jumıs alıp barıp atırǵan ilimiy laboratoriyalardıń potencialınan tolıq hám maqsetli paydalanıwǵa tiykar jaratadı.
Jasalma intellekt texnologiyalarına tiykarlanǵan bul platforma Ózbekstanda ilimniń sanlı keleshegin qáliplestiriw jolındaǵı áhmiyetli qádemlerden biri bolıp, onı usı jıldıń dekabr ayında iske qosıw rejelestirilgen.

Xamroz Bayanov,
ÓzA