Búgin mámleketimizde 31 millionnan aslam xalıq internetten paydalanbaqta. Sonıń menen birge, keyingi bes jılda elimizde kiberjınayatlar sanı 68 esege kóbeygen. 2025-jıldıń ózinde 46 mıńnan aslam kiberjınayat anıqlanǵan. Olar arqalı fizikalıq hám yuridikalıq táreplerge jetkerilgen materiallıq zıyan 1,2 trillion sumnan artqan. Bul sanlar da mámleketlik uyımlardan usı tarawǵa keńirek itibar qaratıwdı hám zárúr ilajlardı kóriwdi talap etpekte.
Usı jıl 13-yanvar kúni Prezidentimizdiń basshılıǵında bolıp ótken Qáwipsizlik keńesiniń keńeytilgen májilisinde mámleketlik hám jámiyetlik turmıstıń barlıq tarawların sanlastırıw sharayatında kiberqáwipsizlikti támiyinlew hám milliy sanlı infrastrukturanıń turaqlılıǵın bekkemlew ayrıqsha áhmiyetke iye ekeni atap ótilip, juwapkerlerge shaxsqa baylanıslı maǵlıwmatlar hám sanlı sistemalardıń qorǵalıwın támiyinlew boyınsha kompleksli ilajlardı belgilew wazıypası tapsırıldı.
Oliy Majlis Nızamshılıq palatasınıń Xalıqaralıq isler, qorǵanıw hám qáwipsizlik máseleleri komiteti tárepinen shólkemlestirilgen “Kiberqáwipsizlikti támiyinlew hám milliy sanlı infrastrukturalardıń turaqlılıǵın bekkemlewdegi tiykarǵı wazıypalar” atamasındaǵı dógerek sáwbetinde kiberqáwipsizlikti támiyinlew, sanlı texnologiyalar hám jasalma intellektti engiziw, sonday-aq, shaxsqa baylanıslı maǵlıwmatlar hám sanlı málimleme qorǵalıwın támiyinlew máseleleri dodalandı.
Ilajda bul baǵdardaǵı tiykarǵı wazıypalarǵa baylanıslı bayanatlar tıńlandı.
Dógerek sáwbeti qatnasıwshıları tárepinen shaxsqa baylanıslı maǵlıwmatlar menen islesiwde kiberqáwipsizlik talapların jetilistiriw, tarawdaǵı huqıqbuzarlıqlar ushın jaza ilajların kúsheytiw, onıń profilaktikasına itibardı kúsheytiw áhmiyetli ekenligi atap ótildi.
Kiberjınayatshılıqtıń jańa túrlerine qarsı nátiyjeli gúresiw, huqıq qorǵaw uyımlarınıń kiberjınayatlarǵa qarsı gúresiw jumısınıń nátiyjeliligin arttırıw, olardıń óz-ara birge islesiwin kúsheytiw zárúrligine itibar qaratıldı.

Muhtarama Komilova,
ÓzA