Xalqımızda “Ne ekseń, sonı orasań”, degen mánili naqıl biykarǵa aytılmaǵan. Sebebi, hár bir insan erteńgi ómiri búgingisinen jaqsıraq bolıwı ushın umtılıp jasaydı. Biraq, bul umtılıw hár qıylı adamlarda túrlishe.
Tábiyǵıy, turmıstıń abadanlıǵın támiyinlewshi eń áhmiyetli qurallardan biri bul pul esaplanadı. Biraq onı da durıs jumsaw kórkem óner. Sebebi hár qanday investiciya da ózin aqlay bermeydi. Sonıń ushın da eń abzal investiciya nege kirgiziliwi kerekligi haqqındaǵı soraw bárqulla aktual.
Ózbek milleti ázel-ázelden óziniń joqarı mánawiyatı hám keń oy-pikiri menen dúnya júzinde dańq taratqan. Buǵan ullı babalarımızdıń dúnyanıń rawajlanıwında óshpes iz qaldırǵan ilimiy-aǵartıwshılıq miyrası mısal. Óz-ózinen belgili, eń abzal investiciya bul bilimlendiriwge kirgizilgen investiciya.
Burınǵı sovet siyasatı sebepli biziń tilimiz, mádeniyatımız hám qádiriyatlarımız ayaq astı etile baslaǵan bir waqıtta milletimiz qaharmanları esaplanǵan aǵartıwshı jadidlerimiz úlken saxnaǵa shıqtı. Olar jaslardı ilimge tartıw hám sanasına millet súyiwshilik ideyaların sińdiriw arqalı milletimizdiń ózligin saqlap qalıwǵa úlken úles qostı.
Bul jolda olar jańa sistema tiykarında mektepler ashıw, orınlarda teatrlar saxnalastırıw arqalı xalıqtıń sanasın ósiriwge bar imkaniyatların iske saldı.
“Mektep sizdi insan eter,
Mektep ómir sawǵa eter
Mektep dárti wayran eter
Ǵayrat salıp oqıń, uǵlan!” dep shaqırǵan edi jadidshilik háreketiniń belsendi aǵzası Abdulla Avloniy.
Jańa Ózbekstannıń búgingi siyasatı da tálim-tárbiyanı birinshi dárejege kóterdi. Jaslar, atap aytqanda, hayal-qızlardıń bilim alıwına ayrıqsha itibar qaratılıp, olardıń oqıwı, turmıs tárizin jaqsılaw ushın zárúr bolǵan qárejetlerdiń úlken bólegi mámleket tárepinen qaplap beriletuǵını jolǵa qoyıldı.
Sonıń ishinde, studentler ijara haqısınıń 50 procentine shekem, kem támiyinlengen, baǵıwshısın joǵaltqan yamasa mayıplıǵı bolǵan shaxslar tólem shártnamasınıń 50 procentin búgingi kúnde mámleket tólep bermekte. Bunıń nátiyjesinde elimizdiń bilimlendiriw sisteması izbe-iz rawajlanıp atırǵan mámleket sıpatında dúnya reytinglerinde tán alınbaqta.
Kórinip turǵanınday, mámleketimiz basshısınıń basshılıǵında Úshinshi Renessansqa qaray qádem taslawdıń tiykarǵı ólshemi bul bilimlendiriw. Solay eken, bul muqaddes wazıypanı orınlawda hár bir ata-ana, hár bir perzent óz wazıypasın juwapkershilik penen orınlaw arqalı úleslerin qosıwı shárt. Sonda ǵana ullı ata-babalarımızǵa múnásip perzent, keleshek áwlad ushın bolsa múnásip jolbasshı bola alamız.

Sherbek Islomov, ÓzA