Usı jıldıń 5-6-fevral kúnleri Pakistan Islam Respublikası Islamabad qalasında Ózbekstan – Pakistan biznes-forumı hám “Made in Uzbekistan” kórgizbesi ótkeriledi.
Mámleketimiz Investiciyalar, sanaat hám sawda ministrliginiń maǵlıwmatına bola, bul ilaj eki mámlekettiń rásmiy hám biznes jámiyetshiligi wákilleri arasında tikkeley sóylesiw ornatıw ushın nátiyjeli maydan jaratadı. Sonday-aq, óz-ara birge islesiwdi rawajlandırıw, investiciya tarawında pikir alısıw hám sawda-ekonomikalıq baylanıslardıń kólemin jáne de keńeytiw imkaniyatın beredi.
Ánjuman sheńberinde respublikamızdıń investiciyalıq potencialı, elimizde sırt el investorların qollap-quwatlaw maqsetinde jaratılǵan sharayatlar, qolaylıq hám mexanizmler tanıstırıladı. Sırt elli sherikler ushın jáne de qolaylı investiciyalıq ortalıqtı qáliplestiriw perspektivası dodalanadı.
“Made in Uzbekistan” kórgizbesinde bolsa eksportqa baǵdarlanǵan, baylanıslardı tereńlestiriwge qaratılǵan milliy islep shıǵarıwshılarımızdıń ónimleri kórsetiledi.

G.Sattorova, ÓzA