Keyingi jılları Ózbekstan ekonomikasında baqlanıp atırǵan ózgerisler xalıqaralıq ekonomikalıq toparlardıń itibarın barǵan sayın kóbirek tartpaqta. Usı mániste Germaniyanıń ekonomikalıq baǵdarda maqalalar járiyalap baratuǵın abıraylı basılımı esaplanǵan “Ostwirtschaft.de” bul ret Ózbekstandaǵı isbilermenlik ortalıǵı, jańalanıw processlerine ayrıqsha itibar qarattı.
Derek Ózbekstan Prezidenti janındaǵı Statistika agentligi maǵlıwmatına súyengen halda, 2026-jıl 1-yanvar jaǵdayına bola elimizde 474 mıń 899 belsendi kárxana hám shólkem bar ekenin joqarı bahalaǵan. Olardıń salmaqlı bólegi kommerciyalıq tarawda jumıs alıp barmaqta. Sonıń ishinde, 407 mıń 850 subekt tikkeley kommerciyalıq kárxanalar bolıp esaplanadı. Bul sanlar mámlekette jeke menshik sektordıń elege shekem ekonomikalıq rawajlanıwda sheshiwshi orın iyelep atırǵanın kórsetedi, delinedi maqalada.
Analizshilerdiń atap ótkenindey, ekonomikanıń tiykarǵı háreketlendiriwshi kúshi sıpatında kishi hám mikro kárxanalar jetekshilikti saqlap qalmaqta. Bul jaǵday isbilermenlik keń xalıqqa súyengen halda rawajlanıp atırǵanın ańlatadı.
Durıs, sońǵı eki-úsh jıl ishinde kárxanalar sanında belgili dárejede qısqarıw baqlanǵan. Atap aytqanda, 2023-jılı dizimge alınǵan rekord dárejedegi – 592 mıńnan aslam kárxana kórsetkishinen keyin bazarda tábiyǵıy tańlaw, yaǵnıy “filtrleniw” procesi júz bergen. Germaniya qánigeleriniń pikirinshe, bul tendenciya muǵdarlıq ósiwden, turaqlılıq hám básekige shıdamlılıqqa tiykarlanǵan sapalı rawajlanıwǵa ótiwdi ańlatadı.
Materialda tarawlıq quram da tallanǵan. Ásirese, Germaniya basılımın qızıqtırǵan tárepi sırt el kapitalınıń qatnasıwındaǵı kárxanalar sanınıń keskin ósiwi bolıp tabıladı. Maǵlıwmatqa bola, bunday kompaniyalardıń sanı 18 mıń 164 ke jetken, bir jıl ishinde 22 procentten artıq ósiw atap ótilgen. Keyingi bes jıl dawamında bolsa olardıń sanı derlik eki esege artqan.
Itibarlı tárepi sonda, sırt el kapitalınıń qatnasıwındaǵı kárxanalardıń derlik 75 procenti tolıq sırt el investorlarına tiyisli. Bul jaǵday Ózbekstandaǵı investiciyalıq ortalıqtıń ashıqlıǵı, huqıqıy kepillikler hám investorlar ushın jaratılǵan sharayatlardıń nátiyjeliliginen dárek beredi, dep jazǵan dárek.
Juwmaq sıpatında germaniyalı analitikler Ózbekstan ekonomikasın jedel transformaciya procesindegi bazar sıpatında bahalap, sırt el investorlarınıń mámleket keleshegine bolǵan isenimi izbe-izlik penen bekkemlenip atırǵanın atap ótpekte.

B.XUDOYBERDIEV,
ÓzAnıń xabarshısı