Jańalanıp atırǵan “Ózbekstan – 2030” strategiyasında “jasıl ekonomika”ǵa ótiw, onıń tiykarı bolǵan qayta tikleniwshi energiyadan paydalanıw kórsetkishleriniń arttırılıwı názerde tutılmaqta.
Awıl xojalıǵında ónimdarlıq hám rentabellik dárejesin keskin arttırıw jáne irrigaciya sistemasın hám suwdı únemleytuǵın texnologiyalardı rawajlandırıw, tarawdı basqarıwǵa jeke menshik sektor hám mámleketlik-jeke menshik sheriklik mexanizmlerin keńnen engiziw sıyaqlı anıq maqset hám wazıypalar da qoyılǵan.
Senattıń Agrar, suw xojalıǵı máseleleri hám ekologiya komitetiniń májilisinde bul haqqında sóz boldı.
Atap aytqanda, hár bir gektardan alınatuǵın ortasha dáramat 5 mıń dollarǵa, awıl xojalıǵı tarawında eksport kólemi jılına 10 milliard dollarǵa jetkeriledi. Ónimdarlıq kórsetkishlerin paxta boyınsha ortasha 45-50 centner, ǵálle boyınsha 90-100 centnerge jetkeriw maqset etilgen.
Suw xojalıǵında obektlerdi mámleketlik-jeke menshik sheriklik tiykarında basqarıwǵa beriw 2012ge jetkeriledi. Nasos stanciyaları modernizaciyalanadı. Elektr energiyasınan paydalanıw keskin azaytıladı. Suwdan paydalanıw nátiyjeliligi 25 procentke arttırıladı. Awıl xojalıǵı egislik maydanların suwdı únemleytuǵın texnologiyalar menen támiyinlew dárejesi 100 procentke jetkeriledi.
Íssıxana gazleriniń jalpı ishki ónim birligine salıstırǵandaǵı kólemi 2010-jıl dárejesine salıstırǵanda 35 procentke qısqartıladı. Qayta tikleniwshi energiya derekleriniń jámi energiya generaciyası (tutınıwı)ndaǵı úlesi 54 procentke jetkeriledi. Qalalar aymaǵınıń keminde 30 procentin jasıl maydanlar quraytuǵını támiyinlenedi. Sonday-aq, xalıqtıń jan basına tuwra keletuǵın respublika boyınsha ulıwma jasıl maydanlardıń kólemi 37,5 procentke arttırıladı.
Dodalaw procesinde klimat ózgeriwi unamsız tásiriniń aldın alıw boyınsha pikirler bildirildi. Qattı turmıslıq shıǵındılardı jıynaw hám alıp shıǵıw xızmetleriniń sapasın jaqsılaw zárúr ekenligine itibar qaratıldı.

N.Abduraimova,
ÓzA