Ájiniyaz atındaǵı Nókis mámleketlik pedagogikalıq institutı Tábiyǵıy pánler fakultetinde biologiya keshki tálim baǵdarınıń pitkeriwshi studentleriniń pitkeriw-qánigelik jumısların qorǵaw procesi bolıp ótpekte.
– Fakultetimizde bıyılǵı jılı bakalavriattıń ximiya hám biologiya qánigeliklerinde keshki tálim baǵdarları boyınsha tiyisli bilimlendiriw baǵdarlamaların tolıq tamamlaǵan hám oqıw rejesinde názerde tutılǵan barlıq sınaqlardan nátiyjeli ótken ulıwma 56 student pitkerip shıqpaqta, – deydi fakultet dekanı Qarjawbay Reymov. – Sonnan 48 student qánigelik pánlerden jazba túrde mámleketlik attestaciyalıq sınaqların tabıslı tapsırdı. Búgin biologiya tálim baǵdarınıń 8 studenti pitkeriw-qánigelik jumısların qorǵamaqta.
Bul processte studentler oqıw dawamında iyelegen teoriyalıq bilim hám ámeliy kónlikpelerdi ilimiy-izleniwler arqalı kórsetiwge háreket etpekte.
Qorǵaw procesi belgilengen keste tiykarında, tájiriybeli professor-oqıtıwshılardan ibarat mámleketlik attestaciyalıq komissiyası qatnasıwında shólkemlestirilmekte. Studentler óz pitkeriw jumıslarında tańlaǵan temalarınıń áhmiyeti, ilimiy jańalıǵı hám ámeliy zárúrligin tiykarlap, komissiya aǵzalarınıń sorawlarına tolıq juwap bermekte.
Maǵlıwmat ornında aytıp ótetuǵın bolsaq, bıyılǵı jılı institutta bakalavriattıń matematika hám informatika, fizika, ximiya, sonday-aq, biologiya keshki tálim baǵdarları boyınsha ulıwma 111 student pitkerip shıǵıwı kútilmekte.

Qaraqalpaqstan xabar agentligi