OpenAI kompaniyası tárepinen islep shıǵılǵan ChatGPT chat-botı Yaponiya universitetlerine kiriw imtixanında toǵız pánnen eń joqarı ball topladı. Jasalma intellekt sistemaların salıstırmalı sınaqtan ótkergen LifePrompt kompaniyası bul haqqında óz esabatında málim etti.
Izertlewde ChatGPT, Gemini hám Claude Opus jasalma intellekt modelleri qatnastı. Imtixan juwmaqlarına bola, ChatGPT 15 pánniń 9 ınan eń joqarı ball topladı, onıń juwaplarınıń ortasha anıqlıǵı 97 procentke jetti. Eń joqarı ball matematika, informatika, ximiya, fizika, biologiya, siyasat hám ekonomika baǵdarlarında belgilendi.
Anthropic kompaniyası tárepinen islep shıǵılǵan Claude Opus modeli úsh pán baǵdarında maksimal ball topladı. Google Gemini eki temada ayrıqsha nátiyjeni kórsetti.
ChatGPT dıń eń tómen nátiyjesi yapon tilinde boldı – juwaplarınıń 90 procenti durıs. Izertlewshiler bunı kórkem tekstte qaharmanlardıń emocionallıq jaǵdayları hám olardıń háreketlerin talqılawdaǵı qıyınshılıqlar menen baylanıstırdı.
LifePrompt tórt jıldan berli usınday imtixanlar ótkerip kelmekte. 2024-jılı ChatGPT sorawlardıń ortasha 66 procentine durıs juwap bergen edi. Keyingi jılı kórsetkish 91 procentke, bıyıl 97 procentke jetti – modeldiń jumıs sapası júdá jaqsılanıp barmaqta.

Qaraqalpaqstan xabar agentligi