Xalıqtı hám awıl xojalıǵın dizimge alıw procesi sheńberinde puqaralar tárepinen onlayn sorawnamanı toltırıwǵa baylanıslı túrli sorawlar kelip túspekte. Bul sorawlarǵa rásmiy juwaplar beriledi.
– Men sorawnamada shańaraq aǵzalarımdı da kirgizip, onlayn dizimnen óttim. Tek maǵan sertifikat shıqtı. Biraq shańaraq aǵzalarımnıń jumıs ornınan olardıń dizimnen ótkenligin dálilleytuǵın sertifikat sorap atır. Bunda qanday jol tutıw múmkin?
– Eger siz onlayn dizimnen ótiw procesinde shańaraq aǵzalarıńızdı da ózińiz benen birge birden-bir sorawnama arqalı kirgizgen bolsańız, demek, olar da dizimge alınǵan bolıp esaplanadı. Bul nızam talaplarına tolıq sáykes keledi.
Biraq sistema texnikalıq jaqtan tek ǵana bir – tiykarǵı respondent atı menen sertifikat qáliplestiredi. Sol sebepli shańaraq aǵzalarıńız ushın óz aldına sertifikat avtomat túrde shıǵarılmaydı.
Eger sizge kvartira quramında kimler dizimnen ótkenligin tastıyıqlawshı maǵlıwmat kerek bolsa, bul maǵlıwmat sertifikattıń tómengi bóliminde keltirilgen. Jumıs ornıńız tárepinen onlayn dizimnen ótkenliginizdi tastıyıqlawshı hújjet soralsa, usı dizimdi usınıwıńız múmkin.
– Dizimnen ótiwde propiskada turǵanlar kórsetile me yamasa ámelde jasap atırǵanlar ma?
– Dizimge alıw procesinde tek ǵana respondent penen birge házirgi waqıtta bir úyde jasap atırǵan shańaraq aǵzaları dizimge kirgiziledi. Propiskada turǵan, biraq házir birge jasamaytuǵın shaxslar kirgizilmeydi.
– JShShIRdi kirgiziwge bolmay atır. Sonday-aq, balanı da qosıp bolmay atır. Ne islew múmkin?
– census.stat.uz saytına OneID arqalı kirilgende shańaraq aǵzaları haqqındaǵı maǵlıwmatlar avtomat túrde shıǵadı. Eger maǵlıwmatlarda qáte yamasa kemshilik bolsa, olardı durıslaw, aǵza qosıw yamasa óshiriw múmkin.
Maǵlıwmat ushın: házirgi waqıtta 16 jasqa shekemgi balalarda da JShShIR bar. Onı my.gov.uz saytındaǵı “Meniń shańaraǵım” bólimi arqalı alıw múmkin.
– Ayırım mámleketlik shólkemlerde dizimnen ótiwdi májbúriy etip, kadastr hújjetleri talap etilmekte. Bul durıs pa?
– Yaq. Dizimnen ótiw ushın kadastr nomeri yamasa kadastr hújjetleri talap etilmeydi. Sorawnamada tek ǵana turaq jay, qurılıs hám jasaw xanaları, sonday-aq, awıl xojalıǵı jerleriniń maydanı boyınsha ulıwma maǵlıwmatlardı biliw jeterli.
Dizimnen ótiw májbúriy me, degen sorawǵa kelsek, mámleketlik uyımlar hám shólkemler sistemasında islep atırǵan xızmetkerler ushın onlayn dizimnen ótiw belgilengen múddetlerde – 2026-jıl 15-yanvardan 31-yanvarǵa shekem – támiyinleniwi Prezident pármanında belgilengen. Sonıń menen birge, belgilengen múddet tamam bolıwınan aldın xızmetkerlerdi májbúriy túrde qıstawlı dizimnen ótkeriw názerde tutılmaǵan.

Qaraqalpaqstan xabar agentligi