Prezident Shavkat Mirziyoev sanlı texnologiyalardı rawajlandırıw tarawında erisilgen nátiyjeler hám 2026-jılǵa mólsherlengen tiykarǵı wazıypalarǵa baǵıshlanǵan prezentaciya menen tanıstı.
Prezentaciyada sońǵı jıllarda sanlı ekonomikanı rawajlandırıw, mámleketlik xızmetlerdi sanlastırıw hám innovaciyalıq ekosistemanı qáliplestiriw boyınsha izbe-iz jumıslar ámelge asırılǵanı atap ótildi. Sırt elli ekspertlerdiń tallawlarına bola, 2024-2025-jıllarda mámleketimizdegi startap hám venchur ekosistemasınıń ulıwma bahası 3,9 milliard dollarǵa jetti. Jergilikli startaplardıń sanı 750 den astı. Házirgi kúnde 15 venchur fondı jumıs alıp barmaqta, venchur kapitalınıń kólemi bolsa 180 million dollardan arttı.
Ózbekstan dúnyadaǵı ekinshi eń tez ósip atırǵan hám Oraylıq Aziyadaǵı eń tez rawajlanıp atırǵan startap ekosisteması dep tán alınbaqta.
Prezentaciyada 2030-jılǵa shekem startaplardıń sanın 5 mıńǵa, eksport bazarlarına shıqqan startaplardıń sanın 200 ge jetkeriw, venchur investiciyalardıń kólemin 2 milliard dollarǵa alıp shıǵıw maqset etilgeni atap ótildi.
Usı maqsette xalıqaralıq tájiriybe tiykarında startaplardı qollap-quwatlawdıń tórt basqıshlı sisteması engizilmekte. Ideya, islep shıǵıw, iske túsiriw hám keńeytiw basqıshlarında grantlar, salıq jeńillikleri, birgelikte qarjılandırıw, eksport qárejetlerin qaplaw ushın qarjı resursları baǵdarlanadı.
Elektron mámleketlik xızmetlerdi jáne de rawajlandırıw rejeleri kórip shıǵıldı.
Sanlı xızmetler sanın 900 ge jetkeriw, “MyGov.uz” mobil qosımshasınıń funkcionalın keńeytiw, 50 den aslam xızmetlerde jasalma intellekt texnologiyaların engiziw, Xalıqtıń birden-bir reestrin islep shıǵıw, isbilermenlik subektin ashıw, jeke tártiptegi isbilermenlik xızmetkerlerin esapqa qoyıw, bank plastik kartasın ashıw, sim-karta alıw, qamsızlandırıw hám reklama xızmetlerin sanlastırıw rejelestirilgen.
Prezentaciyada jasalma intellekt texnologiyaları ushın infrastruktura jaratıw jumıslarınıń barısı haqqında málimleme berildi.
Atap aytqanda, házirgi kúnde zamanagóy kishi super kompyuter iske qosıldı, úlken super kompyuterdi satıp alıw hám iske qosıw jumısları jedel basqıshta. Joybardı ámelge asırıw nátiyjesinde 15 joqarı bilimlendiriw mákemesinde jasalma intellekt laboratoriyaları shólkemlestiriledi, tarawdaǵı qánigelerdiń potencialı artadı, jergilikli JI sheshimlerin engiziw imkaniyatları jaratıladı.
Mámleketimiz aymaqlarında zamanagóy data-oraylar tarmaǵın keńeytiw, maǵlıwmatlardıń qáwipsizligin hám úzliksizligin támiyinlew zárúr ekenligi atap ótildi.
Telekommunikaciya infrastrukturasın rawajlandırıw máselelerine ayrıqsha itibar qaratıldı.
Bul baǵdarda turaqlı ósiw pátlerine erisilip atırǵanı, internet tezligi hám qamtıp alıwı jıldan-jılǵa artıp, mobil baylanıs xızmetleriniń sapası jaqsılanǵanı atap ótildi. 2026-jılı 5G texnologiyaların engiziw hám elatlı punktlerdi joqarı tezliktegi internet penen qamtıp alıwdı dawam ettiriw, sonday-aq, jasalma joldas baylanısınan paydalanıwdı keńeytiw rejelestirilgen.
Prezidentimiz sanlı texnologiyalar ekonomika tarmaqlarınıń básekige shıdamlılıǵın jáne mámleketlik basqarıw sistemasınıń nátiyjeliligin arttırıw hám xalıqtıń turmıs sapasına tikkeley tásir kórsetetuǵının atap ótip, belgilengen wazıypalardı orınlaw boyınsha juwapkerlerge tiyisli tapsırmalar berdi.

ÓzA