Nızamshılıqqa bola, zorlıq aqıbetinde shańaraǵınan alınǵan hám ózine zorlıq islew qáwpi astında bolǵan, sonday-aq, sociallıq jaqtan qáwipli jaǵdayda bolǵan balalar ushın professional tutınǵan shańaraq xızmeti jolǵa qoyıladı.
Ózbekstan Respublikası Prezidentiniń 2025-jıl 24-dekabrdegi “2026-2030-jıllarǵa mólsherlengen Balalardı zorlıqtıń barlıq túrlerinen qorǵaw strategiyasın tastıyıqlaw haqqında”ǵı pármanı bul baǵdarda huqıqıy tiykar bolıp xızmet etedi.
Pármanǵa bola, 2026-jıl 1-fevraldan zorlıq nátiyjesinde shańaraǵınan alınǵan hám ózine zorlıq islew qáwpi astında bolǵan, sonday-aq, sociallıq jaqtan qáwipli jaǵdayda bolǵan balalar ushın professional tutınǵan shańaraq xızmeti jolǵa qoyıladı.
Professional tutınǵan shańaraqtı shólkemlestiriwge talabanlar balalarda zorlıq aqıbetinde alınǵan ruwxıy jaraqatınıń unamsız tásirin azaytıw, minez-qulıqtaǵı awısıwlar hám olardıń aqıbetlerin saplastırıwǵa qaratılǵan sociallıq-reabilitaciya baǵdarlamaları tiykarında oqıtıladı.
Zorlıq aqıbetinde shańaraǵınan alınǵan sociallıq qorǵawǵa mútáj balalar professional tutınǵan shańaraqqa “Insan” orayları hám usı shańaraqlar arasında dúzilgen shártnama tiykarında jaylastırıladı.
Professional tutınǵan shańaraqqa hár bir jaylastırılǵan balanıń kútimi ushın hár ayda miynetke haqı tólewdiń eń kem muǵdarınıń 2 esesi muǵdarında qarjı tólep barıladı. Bunday shańaraqqa jaylastırılǵan hár bir balanıń jasaw qárejetleri ushın nızamshılıqqa muwapıq shańaraqlıq balalar úyi tárbiyalanıwshılarınıń jasaw qárejetleri ushın belgilengen muǵdarlarda qarjı ajıratıladı.

N.Usmonova, ÓzA