Saudiya Arabstanında basıp shıǵarılatuǵın “Al-Yamama” jurnalında Muhammad Rizo Ogahiy atındaǵı xalıqaralıq sıylıq óz iyelerine tapsırılǵanı, bul sıylıqtıń mánisi haqqında maqala basıp shıǵarıldı.
Ózbekstan Jazıwshılar awqamınıń málimleme xızmetine bola, bul jurnal pútkil arab dúnyasında keń tarqalıwshı háptelik basılım bolıp, onıń pútkil arab mámleketleri boylap 500 mıńnan aslam jazıwshıları bar.
Atap aytqanda, jurnal bılay dep jazadı: “Ózbek jazıwshısı Abdulla Qadiriydiń “Mehrabtan shıqqan shayan” romanınıń arab tiline awdarması Ózbekstanda kórkem awdarma tarawındaǵı abıraylı Muhammad Rizo Ogahiy atındaǵı xalıqaralıq sıylıqqa miyasar boldı. Shıǵarma 2024-jılı Arab-rus málimleme hám izertlew orayı tárepinen basıp shıǵarılǵan bolıp, ol Said Mahmud Said Mubashir tárepinen ózbek tilinen arab tiline awdarılǵan”.
Jurnal Arab-rus málimleme hám izertlew orayı Saudiya Arabstanı hám Ózbekstan arasındaǵı siyasiy, ekonomikalıq hám mádeniy baylanıslarǵa baylanıslı izertlew hám ilimiy jumıslar menen bir qatarda, kórkem ádebiyat tarawındaǵı awdarma shıǵarmalardı da turaqlı basıp kiyatırǵanın atap ótip, ózbek romanshılıǵınıń tiykarın salıwshı jaratqan bul romannıń awdarması arab ádebiy jámiyetshiligi arasında úlken qızıǵıwshılıq oyatqanın xabarlaydı.
“Búgingi Jańa Ózbekstannıń ruwxı, onıń jedel rawajlanıwı hám mámleket Prezidentiniń ádebiyat hám ádebiy baylanıslardıń rawajlanıwına basqa da tarawlar qatarında úlken itibar qaratıp atırǵanı maqtawǵa ılayıq. Házirgi waqıtta ózbek ádebiyatın – millet ruwxı hám qálbin sáwlelendiretuǵın bay miyras sıpatında dúnyaǵa tanıtıw, sonday-aq, dúnya ádebiyatınıń eń saylandı úlgilerin ózbek tiline awdarıp, ózbek xalqına usınıw boyınsha keń kólemli jumıslar ámelge asırılmaqta. Sonıń menen birge, jas áwladtı milliy hám ulıwmainsanıylıq joqarı qádiriyatlar tiykarında tárbiyalaw, kitapqumarlıq mádeniyatın rawajlandırıwǵa da ayrıqsha itibar qaratılmaqta. Sebebi milliy hám jáhán ádebiyatınıń wákilleri – shıǵarmaları xalıqlardıń qálbinen orın alǵan shayır hám jazıwshılar – XXI ásirde de insaniyattı jaqsılıq hám adamgershilik principleri tiykarında jasawǵa shaqırıp kelmekte. Bul bolsa Ózbekstan xalqı menen dúnya xalıqları arasındaǵı mádeniy hám ruwxıy kópirlerdi jáne de bekkemleydi”, – dep jazılǵan jurnalda.
“Al-Yamama” jurnalı Muhammad Rizo Ogahiy atındaǵı xalıqaralıq sıylıqqa iye bolǵan dóretiwshilerdiń dizimin de keltiredi, bul sıylıq sebepli keleshekte ashılatuǵın imkaniyatlar haqqında sóz etedi: “Muhammad Rizo Ogahiy atındaǵı xalıqaralıq sıylıq – joqarı tán alıw, awdarmashı dóretiwshilik jumısında áhmiyetli basqısh bolıp esaplanadı, ol materiallıq xoshametlew menen birge, jańa dóretiwshilik izlenislerge kúshli túrtki beredi. Sonıń menen birge, tańlaw kórkem awdarma tarawın rawajlandırıw, xalıqaralıq kólemde doslıq birge islesiw baylanısların kúsheytiwde úlken áhmiyetke iye”.
Maqala sońında bılay delingen: “Saudiya Arabstanı Arab-rus málimleme hám izertlew orayı tárepinen basıp shıǵarılǵan jáne bir kitap bunnan aldın abıraylı xalıqaralıq sıylıqqa miyasar bolǵan edi. Bul – doktor Murtazo Saydumarovtıń “Zamanagóy ózbek ádebiyatında gúrriń janrı: ádebiy-kritikalıq izertlew hám tańlap alınǵan gúrrińler” shıǵarması bolıp, ol 2019-jılı Qatarda ótkerilgen Shayx Hamad xalıqaralıq awdarma hám óz-ara túsinisiw sıylıǵın qolǵa kirgizgen”.

N.Usmonova, ÓzA