Tómengi palatanıń májilisinde puqaralar hám isbilermenler ushın ekonomikalıq hám hákimshilik sudlarǵa múrájat etiwde qolaylı sharayatlar jaratıwǵa qaratılǵan nızam joybarı birinshi oqıwda kórip shıǵıldı. Bul másele boyınsha Joqarǵı sud baslıǵınıń orınbasarı Malika Qalandarova tolıq maǵlıwmat berdi.
Atap ótilgenindey, nızam joybarı menen Jınayat hám Ekonomikalıq processuallıq kodeksleri, Hákimshilik sud jumısların júrgiziw haqqındaǵı kodeks, sonday-aq, “Sudlar haqqında”ǵı hám “Mámleketlik bajı haqqında”ǵı nızamlarǵa bir qatar ózgerisler hám qosımshalar kirgiziw názerde tutılmaqta.
Sonıń ishinde, hákimshilik sud jumısların júrgiziwde – huqıqı buzılǵan shaxslardıń tańlawına bola, ekonomikalıq sud jumısların júrgiziwde bolsa – táreplerdiń kelisimine tiykarlanıp eksterritorial sudlaw mexanizmin engiziw usınıs etilmekte. Onda isti kórip shıǵatuǵın sud avtomatlastırılǵan málimleme sisteması arqalı belgileniwi názerde tutılǵan.
Nızamdaǵı jáne bir áhmiyetli jańalıq eger qarızdarǵa tólewge uqıpsızlıq haqqında is qozǵatılǵan bolsa hám dawa arzası usı is sheńberinde kóriliwi kerek ekenligi sebepli kóriwsiz qaldırılsa, mámleketlik bajı qaytarılıwı belgilenbekte.
Maǵlıwmatlarǵa bola, 2024-jılı ekonomikalıq sudlarda 1000 nan aslam múrájatlar kórip shıǵılmay qalǵan.
Kóplegen sud isleri wálayat oraylarındaǵı sudlarda kórilgen. Aqıbetinde wálayat sudlarında islerdiń kóbeyip ketiwi, islerdi kórip shıǵıw keshigip atırǵan jaǵdaylar baqlanbaqta. Sol sebepli ekonomikalıq sudlardıń strukturasın optimallastırıw názerde tutılmaqta.
Sol arqalı olardıń jumıs nátiyjeliligin arttırıw, birden-bir sud ámeliyatın qáliplestiriw maqset etilgen. Onıń sheńberinde rayonlararalıq, rayonlıq, qalalıq ekonomikalıq sudlar saplastırılıp, Qaraqalpaqstan Respublikası, Tashkent qalası hám wálayat oraylarında rayonlararalıq ekonomikalıq sudlardıń jumısı jolǵa qoyılatuǵını belgilenbekte.
Atap ótilgenindey, bul normalar sudqa múrájat etiwdegi artıqsha áweregershilikti azaytıw, korrupciyalıq faktorlardı saplastırıw jáne sud qararlarınıń sapasın hám nátiyjeliligin arttırıwǵa xızmet etedi.

Muhtarama Komilova,
ÓzA