Prezident Shavkat Mirziyoevqa xalıqtı hám awıl xojalıǵın dizimge alıw ilajların shólkemlestiriw jáne ótkeriw boyınsha ámelge asırılıp atırǵan jumıslar boyınsha málimleme berildi.
Bul ilaj mámleketimizde demografiyalıq processler, miynet resursları, sociallıq infrastruktura hám aymaqlıq rawajlanıwdı ilimiy tiykarda rejelestiriwde úlken áhmiyetke iye. Dizimge alıw processleri xalıqaralıq standartlar tiykarında, zamanagóy sanlı sheshimlerden paydalanǵan halda ámelge asırılmaqta.
Dizimge alıw usı jıldıń 15-yanvarınan 28-fevralına shekem eki basqıshta ótkerilmekte. 15-31-yanvar kúnleri dawam etetuǵın birinshi basqıshta puqaralar arnawlı málimleme sisteması arqalı onlayn dizimnen ótiwi múmkin. Ekinshi basqıshta bolsa 4-28-fevral kúnleri “máhálle jetiligi” xızmetkerleri tárepinen úyme-úy júrip, sorawnamalar planshet qurılmaları arqalı toltırıladı.
Xalıqtı dizimge alıw processleri census.stat.uz portalında ámelge asırılıp, OneID sisteması arqalı identifikaciyalanıwı belgilengen. Barlıq maǵlıwmatlar geomálimleme sisteması tiykarında monitoring etilmekte. Usı maqsette respublika boyınsha 7,6 millionnan aslam kvartira hám turaq jaylardıń geomazılleri qáliplestirildi, processlerdi real waqıt rejiminde baqlap barıw imkaniyatın beretuǵın arnawlı monitoring dashbordları islep shıǵıldı.
Puqaralar tárepinen usınılatuǵın barlıq maǵlıwmatlar nızamshılıq talaplarına muwapıq qorǵaladı, jeke maǵlıwmatlar sır saqlanadı hám tek ǵana statistikalıq maqsetlerde qollanıladı.
Dizimge alıw ilajların joqarı dárejede ótkeriw ushın 14 aymaqlıq, 208 rayonlıq hám qalalıq shtablar shólkemlestirildi. 60 mıńǵa shamalas dizimge alıwshı xızmetkerler tayarlandı. Sonıń ishinde, 54 mıń “máhálle jetiligi” wákilleri, 2,6 mıń rezerv xızmetkerleri hám 4 mıń aymaqlıq shtab aǵzaları processke tartıldı. Sonday-aq, ministrlikler hám uyımlardan 480 trener, joqarı bilimlendiriw mákemelerinen 3200 volontyor oqıwdan ótkerildi.
Xalıqtı xabardar etiw hám úgit-násiyatlaw jumıslarına da ayrıqsha itibar qaratılmaqta. Sonıń ishinde, 110 úgit-násiyatlaw videoroligi, 600 televiziyalıq kórinis tayarlandı, sociallıq tarmaqta 6,3 mıń, xalıq tıǵız jaylasqan orınlar hám jámiyetlik transportlarda 23 mıńnan aslam málimleme materialları jaylastırıldı.
Atap ótilgenindey, búgingi kúnge shekem arnawlı portal arqalı 2,48 million shańaraq jáne 31 mıń fermer xojalıqları hám awıl xojalıǵı kárxanaları dizimge alındı.
Mámleketimiz basshısı xalıqtı hám awıl xojalıǵın dizimge alıw ilajların sapalı ótkeriw, maǵlıwmatlardıń isenimliligin támiyinlew hám olardan qarar qabıl etiw processlerinde keńnen paydalanıw áhmiyetli ekenligin atap ótti.

ÓzA