19-yanvar kúni Tashkent qalasında Ózbekstan Respublikası Prezidenti Shavkat Mirziyoev paytaxtımızda toqtaǵan Italiya Respublikası Bas ministri Jorja Meloni menen ushırasıw ótkerdi.

Ózbekstan – Italiya strategiyalıq sheriklik qatnasıqların jáne de bekkemlew hám kóp táreplemeli birge islesiwdi keńeytiwdiń ámeliy tárepleri kórip shıǵıldı.

2025-jıldıń may ayında Samarqandta joqarı dárejede erisilgen kelisimlerdiń izbe-iz ámelge asırılıp atırǵanı qanaatlanıwshılıq penen atap ótildi.

Hár qıylı dárejelerde jedel sóylesiwler dawam etpekte. Tovar almasıw kólemi hám qospa kárxanalardıń sanı turaqlı ósip barmaqta. Aymaqlararalıq, sonıń ishinde, Lombardiya menen almasıwlar rawajlanbaqta. Ózbekstan puqaralarınıń tártipli miynet migraciyası ushın kvotalar ajıratıldı.

“Finopera”, “ANCI”, “Pietro Fiorentini”, “Danieli” hám basqa da kompaniyalar menen birgelikte iri sanaat kooperaciyası joybarları ámelge asırılmaqta. Ótken jıldıń aqırında Samarqandta Tushia universitetiniń filialı ashıldı.

Usı jılı sırtqı siyasat uyımlarınıń strategiyalıq qarım-qatnası hám húkimetleraralıq komissiyanıń májilisleri, sonday-aq, ekinshi Rektorlar forumın ótkeriw rejelestirilgen.

Toqımashılıq sanaatı, geologiya, energetika, ximiya, qurılıs materialları, finans bazarı hám basqa da tiykarǵı tarawlardaǵı birgeliktegi joybarlardı alǵa qoyıwǵa ayrıqsha itibar qaratıldı.

Italiyada Ózbekstan, Ózbekstanda bolsa Italiya kinosı kúnlerin ótkeriw haqqında kelisimge erisildi. Ózbekstannıń gezektegi Veneciya biennalesinde qatnasıwı hám usı jılı Milanda ámeliy kórkem óner hám muzey kórgizbelerin ótkeriw rejeleri qollap-quwatlandı.

Xalıqaralıq hám regionallıq kún tártibi boyınsha da pikir alısıldı.

Ushırasıw juwmaǵında Ózbekstan Prezidenti Shavkat Mirziyoev Italiya Bas ministri Jorja Melonidi Ózbekstanǵa arnawlı sapar menen keliwge mirát etti.

ÓzA