Jańa xalıqaralıq reyting nátiyjesine bola, Ózbekstan puqaraları 61 mámleketke vizasız yamasa viza alıwdıń ápiwayılastırılǵan tártibi tiykarında sayaxat etiw imkaniyatına iye boldı.
Xalıqaralıq migraciya hám puqaralıq máseleleri boyınsha izertlew alıp baratuǵın abıraylı kompaniya járiyalaǵan “Henley Passport Index” reytinginde mámleketimiz pasportı dúnyada 75-orındı iyeledi. Qırǵızstan da biz benen birdey nátiyje kórsetken.
Oraylıq Aziya mámleketleri arasında Qazaqstan jetekshi: 78 mámleketke vizasız kiriw imkaniyatı, 61-orın.
Haqıyqatında da, 2025-jıldıń basında pasportımızdıń statusı jaǵınan 80-orında edi. Yaǵnıy, puqaralarımız 64 mámleketke erkin kire alatuǵın edi. Házir Ózbekstannıń ornı jaqsılanǵan bolsa da, vizasız mámleketler sanı biraz azayǵan.
Jáhán kóleminde jetekshilik elege shekem Singapur pasportında. Bul mámleket puqaraları 192 mámleketke vizasız sayaxat etiwi múmkin. Bul indeks tariyxındaǵı eń joqarı kórsetkish. Ekinshi orındı Qubla Koreya hám Yaponiya iyelep alǵan – 188 mámleket ashıq. Úshinshi orında Daniya, Lyuksemburg, Ispaniya, Shveciya hám Shveycariya. Evropanıń bul mámleketlerinen 186 mámleketke vizasız kiriw múmkin.
Reytingtiń tómengi bóleginde kóp jıllardan berli qurallı kelispewshilik tásirinde qalıp atırǵan mámleketler. Awǵanstan pasportı eń ázzi – awǵanlar tek ǵana 24 mámleketke vizasız baradı. Sonday-aq, Siriya hám Irak ta eń tómen kórsetkishke iye mámleketler qatarında qalmaqta.

F.Yaxshiboeva, ÓzA