Ózbekstan Respublikası Prezidenti Shavkat Mirziyoevtiń atına Amerika Qurama Shtatları Prezidenti Donald Tramptan Jaqın Shıǵısta tınıshlıqtı bekkemlew hám kelispewshiliklerdi sheshiw boyınsha xalıqaralıq baslamaǵa qosılıw boyınsha rásmiy usınıs kelip tústi.
Xatta atap ótiliwinshe, bul baslama 2025-jıl 29-sentyabrde járiyalanǵan hám dúnya jetekshileri tárepinen qollap-quwatlanǵan, sonday-aq, BMSh Qáwipsizlik Keńesiniń 2025-jıl 17-noyabrdegi 2803-sanlı rezolyuciyası menen maqullanǵan Gazadaǵı kelispewshilikti saplastırıw boyınsha kompleksli rejesine tiykarlanadı.
Baslamanıń tiykarǵı maqseti uzaq múddetli tınıshlıq, turaqlılıq hám qáwipsizlikti qáliplestiriw ushın juwapkershilikti óz moynına alıwǵa tayar bolǵan mámleketlerdi birlestiriwge qaratılǵan jańa xalıqaralıq struktura – Tınıshlıq keńesin dúziwden ibarat.
Ózbekstan Respublikasına Tınıshlıq keńesine shólkemlestiriwshi mámleket sıpatında qosılıw usınıs etildi.
Mámleketimiz basshısı amerikalı kásiplesine juwap xatın jollap, onda Ózbekstan Tınıshlıq keńesine shólkemlestiriwshi mámleket sıpatında qosılıwǵa tayar ekenin bildirdi.
Prezidentimiz óz xatında bul baslamaǵa Jaqın Shıǵıstaǵı kóp jıllıq kelispewshiliklerdi sheshiw, keń regionda tınıshlıq hám turaqlılıqtı támiyinlew jolındaǵı áhmiyetli qádem sıpatında qaralıp atırǵanın atap ótti.

ÓzA