“Ózbekstan – 2030” strategiyası joybarında mámleketimizdiń barlıq tarawdaǵı jetiskenliklerin jáne de bekkemlew, joqarı basqıshlarǵa kóteriwge qaratılǵan bir qatar maqsetler, tiykarǵı wazıypalar óz kórinisin tapqan.
Sonıń ishinde, tálim-tárbiya tarawında da áhmiyetli maqsetler hám joqarı shekler gózlengen. Sońǵı jılları tálim-tárbiya tarawına jeke menshik sektordı keńnen tartıw, sol arqalı tarawda jáne de keń imkaniyatlar jaratıw máselelerine tiykarǵı áhmiyet qaratılıp kiyatırǵanlıǵın atap ótiw kerek.
Bul baǵdarda strategiya joybarında da ulıwma orta bilimlendiriwdi rawajlandırıw ushın jeke menshik sektordı keńnen tartıw maqseti názerde tutılǵan. Atap aytqanda, mámleketlik emes ulıwma orta bilimlendiriw shólkemleriniń sanın usı 2026-jılı 750 ge, 2027-jılı 800 ge, 2028-jılı 850 ge, 2029-jılı 900 ge, 2030-jılı bolsa 1 000 ǵa jetkeriw maqseti belgilengen.
Strategiya joybarınıń áhmiyetli táreplerinen biri sonda, hár bir jıl ushın óz aldına maqsetli kórsetkish názerde tutılǵan. Sonıń menen birge, belgilengen maqsetlerge erisiwdiń anıq finanslıq derekleri de názerde tutılmaqta. Máselen, 2030-jılǵa barıp mámleketlik emes ulıwma orta bilimlendiriw shólkemleriniń sanın mıńǵa jetkeriw wazıypasın ámelge asırıwdıń finanslıq tiykarı sıpatında jeke menshik sektor qarjıların tartıw belgilengen.
Sonday-aq, strategiyalıq hújjet joybarında mámleketlik emes ulıwma orta bilimlendiriw shólkemlerinde bilim alıp atırǵan oqıwshılardıń úlesin 3 esege arttırıw názerde tutılmaqta.
Bunday wazıypalardı ámelge asırıw ulıwma orta bilimlendiriw sisteması jáne de sapalı, nátiyjeli bolıwına, jas áwladtıń zamanagóy bilimlendiriw menen qamtıp alınıwına xızmet etedi.
Maǵlıwmat ornında atap ótiw kerek, “Ózbekstan – 2030” strategiyası joybarın bunnan bılay da jetilistiriwde puqaralardıń belsendiligi, usınıslar menen qatnasıwı xalıqshıl strategiyanıń qabıl etiliwine tiykar boladı.

Muhtarama Komilova,
ÓzA