Ózbekstan Respublikası Prezidentiniń 2025-jıl 30-yanvardaǵı “Ózbekstan-2030” strategiyasın “Qorshaǵan ortalıqtı qorǵaw hám “jasıl ekonomika” jılında ámelge asırıwǵa baylanıslı mámleketlik baǵdarlama haqqında”ǵı 16-sanlı Pármanına muwapıq, mámlekette ekologiyalıq jaqtan qáwipli hám energiya jumsalıwı joqarı bolǵan óndirislik quwatlıqlardı modernizaciyalaw jáne olardı basqıshpa-basqısh qalalardan sırtqa kóshiriw boyınsha sistemalı ilajlar ámelge asırılmaqta.
Bir sanaat kárxanasın paytaxt aymaǵınan sırtqa kóshiriw jılına 226 tonnadan aslam shıǵındını qısqartıw imkaniyatın beredi.
Bul hújjette juwapker shólkemler menen birgelikte Tashkent hám Nókis qalaları, sonday-aq, wálayat oraylarınan asbest hám cement sanaatı, bılǵarı ayaq kiyim hám qusshılıq óndirisleri, qara hám reńli metallurgiya, sonday-aq, energiya tutınıwı joqarı bolǵan basqa da tarmaqlarǵa tiyisli kárxanalardı kóshiriw boyınsha tiykarlanǵan usınıslar islep shıǵıw názerde tutılǵan.
Atap aytqanda, Tashkent qalasında jumısı usı talaplarǵa sáykes keletuǵın 87 kárxana bolıp, olardı kóshiriw óndiris quwatlıqların modernizaciyalaw hám texnologiyalıq processlerdi zamanagóy ekologiyalıq standartlarǵa muwapıqlastırıw shárti menen basqıshpa-basqısh ámelge asırılıwı rejelestirilgen.
Belgilengen wazıypalardıń orınlanıwın támiyinlew maqsetinde Arnawlı komissiya tárepinen sanaat obektlerinde turaqlı túrde reyd tekseriwleri ótkerilmekte. Sonıń ishinde, Tashkent qalasınıń Yangihayot rayonı Qubla sanaat zonasında ekilemshi reńli metallardı jıynaw, qayta islew hám islep shıǵarıwǵa qánigelesken “Ózvtorsvetmet” AJ jumısı tekserilip kórildi. Bul kárxana ekologiyalıq qáwipliliktiń I kategoriyasına tiyisli obekt esaplanadı.
2025-jıl oktyabr ayında ótkerilgen tekseriw nátiyjelerine bola, qorshaǵan ortalıqtı pataslandırıw jaǵdayları anıqlanǵan. Kárxanaǵa májbúriy kórsetpe berilip, jetkerilgen ekologiyalıq zıyan ushın 18 milliard 91 million 717 mıń 137 sum muǵdarında kompensaciya esaplandı.
Arnawlı komissiyanıń qararı hám Ekologiya hám klimat ózgeriwi milliy komitetiniń kórsetpelerine tiykarlanıp, qorshaǵan ortalıqqa unamsız tásirdiń aldın alıw maqsetinde kárxana Jizzaq wálayatındaǵı sanaat zonasına kóshiriledi hám Yangihayat rayonı aymaǵında óndiris jumısın toqtatadı.
Kompensaciya tólemleri boyınsha berilgen jeńillikler esabınan eskirgen hám ekologiyalıq jaqtan zıyanlı eritiw pechleri utilizaciyalanadı hám kárxana jumısın zamanagóy ekologiyalıq talaplarǵa tolıq juwap beretuǵın, texnologiyalıq jaqtan jetilisken úskenelerde dawam ettiredi.
Kórilgen ilajlar nátiyjesinde jılına ortasha 226,7 tonna zıyanlı zatlardıń atmosferaǵa shıǵarılıwınıń aldı alınıwı kútilmekte. Bul bolsa Tashkent qalasınıń Yangihayat rayonında hawa sapasınıń sezilerli dárejede jaqsılanıwına xızmet etedi,-dep málimleme beredi xabar.uz saytı.

Qaraqalpaqstan xabar agentligi