Múnásibet

Mámleketimiz basshısı ótken jılı 26 sırt mámleketke joqarı dárejedegi saparlardı ámelge asırdı. Sonday-aq, jańa tariyxımızda birinshi márte bir qatar mámleketler basshılarınıń Ózbekstanǵa saparları shólkemlestirildi.
“Oraylıq Aziya plyus” formatındaǵı kóp tárepleme sóylesiwler de nátiyjeli boldı. Keyingi jıllarda 11 mámleket penen strategiyalıq sheriklik ornatıldı. Búgingi kúnde bunday sheriklerdiń sanı 19 ǵa jetti.
Bul pikirler Prezident Shavkat Mirziyoevtiń basshılıǵında 15-yanvar kúni Sırtqı isler ministrligi hám sırt eldegi diplomatiyalıq wákilxanalardıń jumısına baǵıshlanǵan videoselektor májilisinde atap ótildi.
Xalıqaralıq ekspertler bul sóylesiwdi sırtqı siyasattaǵı jańa basqısh sıpatında bahalamaqta. Májiliste qatnasqan elshiler ÓzAnıń xabarshısına óz pikirlerin bildirdi.
Botirjon ASADOV,
Rossiya Federaciyasındaǵı Ayrıqsha hám tolıq huqıqlı elshi:
– Mámleketimiz basshısı atap ótken máseleler, berilgen tapsırmalar hám jaratılǵan imkaniyatlar diplomatlar ushın oǵada áhmiyetli kórsetpeler boldı. Jáhán siyasiy kórinisi keskin ózgerip atırǵan bir waqıtta sırtqı siyasat jumısı oǵada teń salmaqlı hám hár tárepleme tallawǵa tiykarlanǵan bolıwı zárúr. Prezidentimiz búgingi sharayatta Sırtqı isler ministrligi qanday islewi kerek ekenligi, Jańa Ózbekstan elshisi qanday bolıwı kerek ekenligi haqqında anıq, ashıq usınıslar berdi.
Jumısımızdaǵı kemshilikler de ashıq atap ótildi. Bul biz ushın áhmiyetli sabaq. Májiliste ekonomikalıq diplomatiyanı sezilerli dárejede kúsheytiw, eksport hám investiciya kólemin arttırıw, jańa bazarlar ashıw sıyaqlı tiykarǵı wazıypalar belgilep berildi.
Turizm tarawında elshilerdiń roli jáne de arttırılıwı, watanlaslar menen turaqlı pikirlesiwde bolıw, mashqalalardı ornına barıp sheshiw, “kabinet diplomatiyası”nan waz keshiw sıyaqlı kórsetpeler de hár birimiz ushın ayrıqsha juwapkershilik júkledi.
Bunnan bılay bizden belsendi intakerlik, nátiyje hám anıq ámeliy jumıs talap etiledi.
Alisher ABDUSALOMOV,
Koreya Respublikasındaǵı Ayrıqsha hám tolıq huqıqlı elshi:
– Prezidentimiz sırtqı ekonomikalıq baylanıslardı keńeytiwde aymaqlar hám elshixanalar arasındaǵı birge islesiw jeterli dárejede rawajlanbaǵanın ashıq atap ótti. Bul másele bizge jańa wazıypalar júkleydi. Wálayatlar menen birgelikte islep shıǵarılıp atırǵan ónimlerdi sırt elde sistemalı úgit-násiyatlaw, kárxanalarımızǵa sırtqı bazarǵa shıǵıwda ámeliy járdem beriw biz, elshiler ushın tiykarǵı baǵdar bolıp qaladı.
Sonıń menen birge, Qubla Koreya menen birgelikte aldıńǵı texnologiyalardı tartıw, sanaattı modernizaciyalawǵa xızmet etetuǵın joybarlardı kóbeytiwge itibar qaratamız. Joqarı texnologiyalı óndirislerdi elimizge alıp keliw boyınsha da anıq wazıypalardı rejelestirip atırman.
Turizm hám mádeniyat tarawlarında jańa kózqarastı engiziw zárúr ekenligi aytıldı. Sonday-aq, biz virtual turistlik kórgizbelerdi shólkemlestiriw, Koreya bazarında milliy ónimlerimizdi úgit-násiyatlaw boyınsha jańasha jumıs islewge ótemiz. Bilimlendiriw, densawlıqtı saqlaw hám kadrlar tayarlaw boyınsha bolsa xalıqaralıq grantlardı keń kólemde tartıw rejelerin belgilep aldıq.
Atap ótilgen hár bir másele diplomatiyanıń jańa basqıshına sáykes túrde belsene islewge shaqıradı.
Furqat SIDIQOV,
Amerika Qurama Shtatlarındaǵı Ayrıqsha hám tolıq huqıqlı elshi:
– Ózbekstan hám AQSh arasındaǵı strategiyalıq qatnasıqlar endi tolıq túrde institucionallastı, dep aytıw múmkin. Amerika Qurama Shtatları mámleketimizdi regiondaǵı isenimli hám perspektivalı sherik sıpatında kórmekte. Bul tán alıwdıń tiykarında Prezidentimizdiń basshılıǵında alıp barılıp atırǵan ishki hám sırtqı siyasattıń izbe-izligi, ámelge asırılıp atırǵan keń kólemli ekonomikalıq reformalardıń ámeldegi nátiyjeleri jámlengen.
Búgingi kúnde Ózbekstan menen AQSh qatnasıqları tek ǵana eki tárepleme baǵdarda emes, al pútkil regionallıq birge islesiwdi jańa basqıshqa alıp shıǵıwda áhmiyetli faktorǵa aylanbaqta. Házirgi siyasiy sóylesiw dárejesi óz-ara isenim hám húrmetke tiykarlanǵanı ushın ekonomikalıq tarawda da sezilerli ilgerilewler baqlanbaqta.
Ózbekstanǵa AQShtıń jetekshi kompaniyaları hám iri finans institutlarınıń qızıǵıwshılıǵı artıp barmaqta. Bizge belgili, bunday kompaniyalardıń belgili bir bazarǵa kiriwi ańsat emes. Sebebi olar tek ǵana turaqlı, isenimli hám perspektivalı mámleketlerge investiciya qaratadı. Usı jaǵınan, mámleketimizdegi biznes ortalıǵınıń jaqsılanıp barıwı sırt el investorları ushın jańa imkaniyatlar ashpaqta.
Bunnan tısqarı, búgingi kúnde Ózbekstan AQShtıń iri texnologiyalıq kompaniyaları ushın málimleme texnologiyaları boyınsha xızmet kórsetiw “xab”ına aylanıp barmaqta.
Májilis dawamında mámleketimizdiń turizm potencialın arttırıw, investiciyalardı keń kólemde tartıw hám sırt eldegi watanlaslarımızǵa járdem beriw boyınsha anıq wazıypalardı belgilep aldıq.
Haqıyqatında da, elshixana hám konsullıq mákemeleri puqaralarımızdıń nızamlı máplerin qorǵawda belsendi bolıwı shárt. Sırt eldegi watanlaslarımızdıń hár bir múrájatına tolıq itibar beriw, zárúr jaǵdaylarda tájiriybeli yuridikalıq járdem kórsetiw biziń tikkeley wazıypamız.

ÓzAnıń xabarshısı Ikrom AVVALBOEV jazıp aldı.