Ózbekstanda kitapqumarlıq mádeniyatın rawajlandırıw hám xalıq arasında kitap oqıwǵa qızıǵıwshılıqtı arttırıwǵa qaratılǵan qarar qabıl etildi.
2026-jıl 15-yanvar kúni “Kitapqumarlıq mádeniyatın rawajlandırıw hám xalıq arasında kitap oqıwǵa qızıǵıwshılıqtı arttırıw ilajları haqqında”ǵı Prezident qararına (PQ-9-sanlı) qol qoyıldı.
Qararǵa muwapıq, barlıq ministrlikler hám uyımlarda bir qatar jańa baslamalar engiziledi. Sonıń ishinde, 2026-jıl 1-martqa shekem hár bir taraw boyınsha usınıs etiletuǵın kásiplik jumısqa baylanıslı ádebiyatlar dizimi qáliplestiriledi.
Sonday-aq, hár jılı keminde úshewden kásiplik jumısqa baylanıslı sırt el ádebiyatları jergilikli basılımlar arqalı ózbek tiline awdarılıp, maman qánigelerdiń qatnasıwında túsindiriwler, sózlik hám mısallar menen bayıtıladı.
Qararda 2026-jıl 1-aprelge shekem barlıq ministrlikler hám uyımlarda, sonday-aq, olardıń sistemasındaǵı shólkemlerde “Kitap múyeshi”n shólkemlestiriw jáne xızmetkerler ushın hár ayda “Kitap oqıw saatı”n jolǵa qoyıw belgilengen.
Bunnan tısqarı, shólkemlerde kitapqumarlıq boyınsha ishki reyting sisteması engiziledi. Tańlaw tiykarında eń kóp kitap oqıǵan xızmetkerge bir aylıq miynet haqı muǵdarında aqshalay sıylıq beriledi.
Jaslardıń kitapqumarlıǵın xoshametlew maqsetinde eń kóp kitap oqıǵan oqıwshı hám studentlerden ibarat top-100 likke kirgen hár bir qatnasıwshıǵa bazalıq esaplaw muǵdarınıń 25 esesi muǵdarında aqshalay sıylıq beriliwi de názerde tutılǵan.

Qaraqalpaqstan xabar agentligi