Prezident Shavkat Mirziyoev xalıqaralıq mádeniy ilajlardıń nátiyjeleri, turizm tarawın rawajlandırıw boyınsha gezektegi wazıypalar jáne iri mádeniyat hám turizm obektlerin qurıwǵa baylanıslı prezentaciya menen tanıstı.
Sońǵı jıllarda Ózbekstan xalıqaralıq mádeniyat mákanında óz ornın izbe-iz bekkemlep barmaqta. Samarqandta YuNESKO Bas konferenciyasınıń 43-sessiyası 190 mámleketten 3 mıńnan aslam delegatlardıń qatnasıwında tabıslı ótkerildi. Ilaj juwmaqlarına bola, Ózbekstannıń mádeniy miyrastı qorǵaw, bilimlendiriw hám kreativ ekonomika boyınsha baslamaların ámeliyatqa engiziw boyınsha “jol kartası” islep shıǵıldı hám tastıyıqlandı.
Mámleketimizdiń Yaponiyada bolıp ótken EKSPO-2025 Pútkil jer júzilik kórgizbesindegi qatnasıwınıń juwmaqları esap-sanaq etildi. Ózbekstannıń 1,2 mıń kvadrat metr maydanda shólkemlestirilgen “Bilimler baǵı” pavilonına 1 millionǵa shamalas adam keldi. Usınılǵan ekspoziciyalar xalıqaralıq kólemde keńnen sáwlelendirildi hám eń kóp barılǵan pavilonlar qatarınan orın aldı. Házirgi waqıtta Saudiya Arabstanında bolıp ótetuǵın EKSPO-2030 kórgizbesinde qatnasıwǵa tayarlıq jumısları baslanıp, maydanı 3,6 mıń kvadrat metr bolǵan pavilon qurılısı rejelestirilgen.
Buxarada ótkerilgen birinshi Zamanagóy kórkem óner biennalesine ayrıqsha itibar qaratıldı. 70 kún dawam etken ilaj 3,5 gektar maydandı hám 14 restavraciyalanǵan mádeniy miyras obektlerin qamtıp aldı. Biennaleda 40 tan aslam mámleketten 70 dóretiwshi hám kurator qatnastı. Ilajda qatnasqanlardıń sanı derlik 1,8 milliondı qurap, sonıń ishinde, 100 den aslam joqarı mártebeli sırt el miymanı keldi. Ózbekstannıń 2021-jıldan berli Veneciya biennalesinde turaqlı túrde qatnasıp atırǵanı bolsa Italiyadan turistler aǵımınıń ósiwine xızmet etip atırǵanı atap ótildi.
Mámlekette iri xalıqaralıq koncert baǵdarlamaları ótkerildi. Atap aytqanda, Tashkentte Jennifer Lopes, Xiywada Black Coffee, Samarqandta Andrea Bochelli koncertleri bolıp ótti. Ilajlardı ótkeriw dáwirinde bul qalalarda miymanxanalardan paydalanıw dárejesi 90 procentten astı, bul bolsa turizm hám xızmetler tarawınıń dáramatlarına unamlı tásir kórsetti.
2025-jılı turistler sanı 11 millionnan artıp, turistlik xızmetler eksportı 4,8 milliard dollarǵa jetkeni, sonday-aq, vizasız tártip engizilgen mámleketlerdiń sanı 94 ke kóbeygeni atap ótildi.
Sonıń menen birge, turizm tarawın joybar basqarıw sistemasına ótkeriw, turizm ónimlerin jaratıw hám rawajlandırıw boyınsha birden-bir mexanizmdi engiziw jáne iri ilajlardı muwapıqlastırıwdı kúsheytiw zárúr ekenligi kórsetip ótildi.
Taraw jumısın sanlastırıwǵa ayrıqsha itibar qaratıldı. Mámleketlik hám jeke menshik málimleme sistemaların úylestirip, Milliy turizm platformasın iske qosıw, turistler hám isbilermenler ushın proaktiv sanlı xızmetlerdi engiziw, naq pulsız esap-sanaqlardı keńeytiw hám turistler aǵımın tallaw wazıypaları belgilep berildi. Sanlastırıw arqalı jasırın ekonomika úlesin qısqartıw hám turistlik jıyımnan jıllıq túsimlerdi arttırıw rejelestirilgeni atap ótildi.
Mámleketimizdiń turizm potencialın AQSh, Persiya buǵazı mámleketleri, Hindstan, Qıtay hám Skandinaviya sıyaqlı tiykarǵı bazarlarda alǵa qoyıw boyınsha jańa marketing strategiyasın ámelge asırıw zárúrligi atap ótildi. Ózbekstannıń xalıqaralıq turistlik platformalardaǵı qatnasıwın keńeytiw, sanlı kontentti rawajlandırıw jáne iri media resursları hám pikir jetekshilerin tartıw wazıypaları belgilendi.
Prezentaciyada iri mádeniyat hám turizm obektleriniń joybarları kórip shıǵıldı.
Samarqandta “Samarqand miyrası jolı” joybarı jumıs baslamaqta. Registan ansambli, Bibixanım hám Shohi Zinda kompleksleri jáne Mırza Ulıǵbek observatoriyasın 6,6 kilometrlik birden-bir turistlik baǵdar óz-ara baylanıstıradı. Samarqandta jańa “Jipek jolı” muzeyin qurıw joybarı tanıstırıldı. Ulıwma maydanı 19,5 mıń kvadrat metrdi quraytuǵın úsh qabatlı zamanagóy imarat qurılıp, onda inklyuziv ortalıq, kórgizbe zalları, eksponatlardı saqlaw fondları, sonday-aq, bilim alıwǵa mólsherlengen aymaqlar jaratıw názerde tutılǵan.
Mırza Ulıǵbek observatoriyası aymaǵında landshaft dizaynın jańalawdı rejelestirmekte. Jańa muzey imaratı, immersiv kórgizbe zalları, keliwshiler ushın oray qurıladı. Piyadalar jolları abadanlastırılıp, arxeologiyalıq obektler birden-bir muzey ortalıǵına úylestiriledi.
Sonday-aq, Buxara qalasınıń bas rejesi tanıstırıldı. Onda qolaylı qala ortalıǵın qáliplestiriw, transport hám turizm infrastrukturasın rawajlandırıw, sonday-aq, kongress-xoll, amfiteatr, kitapxana, fud-xoll, usaqlap satıw hám kommerciyalıq obektler jáne joqarı kategoriyalı miymanxananı óz ishine alatuǵın kóp funkciyalı kompleks sıpatında tariyxıy-etnografiyalıq baǵ jaratıw názerde tutılǵan.
Dodalaw juwmaǵında Prezidentimiz mádeniy joybarlardı turizmdi rawajlandırıw wazıypaları menen óz-ara baylanısqan halda ámelge asırıw, olardıń ekonomikalıq turaqlılıǵın hám sapalı basqarılıwın támiyinlew zárúrligin ayrıqsha atap ótti.

ÓzA