Mámleketimiz basshısınıń usınısı hám baslamasına bola, “Ózbekstan – 2030” strategiyası búgingi rawajlanıw tendenciyalarınan kelip shıqqan halda jańalanbaqta. Jańalanıp atırǵan strategiya joybarında 2026-2030-jıllarǵa mólsherlengen jańa nátiyjelilik kórsetkishleri óz kórinisin tapqan.
2023-jılı qabıl etilgen “Ózbekstan – 2030” strategiyası mámleket rawajlanıwınıń orta múddetke mólsherlengen tiykarǵı baǵdarları, maqsetleri hám olarǵa erisiw boyınsha nátiyjelilik kórsetkishlerin belgilep bergenin atap ótiw kerek. Onıń sheńberinde izbe-izlik penen ámelge asırılǵan reformalar nátiyjesinde elimizde kámbaǵallıq dárejesi 11 procentten 6,8 procentke tústi, jalpı ishki ónim kólemi 107,5 milliard dollardan 140 milliard dollarǵa jetti, eksport kólemi 24,9 milliard dollardan 27,9 milliard dollarǵa arttı.
Sonday-aq, jumıssızlıq dárejesi 6,8 procentten 4,9 procentke tústi. Ózbekstan Global innovaciyalıq indeksinde 139 mámleket arasında 82 orınnan 79-orındı iyeledi. Ózbekstan menen diplomatiyalıq qatnasıqlar ornatqan mámleketlerdiń sanı 144 ten 164 ke jetti.
Hár bir taraw hám baǵdarda isenim menen qolǵa kirgizilip atırǵan nátiyjelerdi turaqlı dawam ettiriw, óz aldımızǵa jáne de joqarı sheklerdi qoyǵan halda búgingiden de joqarı nátiyjelerge erisiw hám sol arqalı xalıqtıń abadanlıǵın jáne de arttırıw mámleketimizdiń eń joqarı maqseti bolıp esaplanadı.
Usı maqsette jańalanıp atırǵan 2026-2030-jıllarǵa mólsherlengen “Ózbekstan – 2030” strategiyası joybarında 451 maqsetli kórsetkish belgilengen. Ámeldegi strategiyamızda bolsa 100 maqset sáwlelengen edi. Joybardaǵı 451 maqsetli kórsetkishten 132 kórsetkish jańa redakciyada hám jańa normalar tiykarında belgilenbekte, 190 jańa kórsetkish penen tolıqtırılmaqta. 129 kórsetkish ózgerissiz qaldırılıp atırǵan bolsa, 184 kórsetkish alıp taslanbaqta.
Ámeldegi strategiyada KPI kórsetkishleri belgilenbegen. Endi bolsa KPI kórsetkishi túsinigi islep shıǵılıp, dáreje, úles, procent, kólem, ball sıyaqlı birliklerde bolıwı názerde tutılmaqta. Hár bir baǵdarda názerde tutılıp atırǵan maqset-wazıypalar jıldan-jılǵa tárizde belgilenip, qaysı jılda qanday nátiyjege erisiw kerek ekenligi belgilep berilip atırǵanı itibarǵa ılayıq. Sebebi, bul gózlengen maqset-wazıypalarǵa anıqlıq, reallıq baǵıshlap, olarǵa erisiw ushın shekti bálent alıw hám soǵan múnásip tárizde háreket etiwge iytermeleydi.
Bir sóz benen aytqanda, jańalanıp, bayıtılıp atırǵan “Ózbekstan – 2030” strategiyası joybarı Ózbekstannıń barlıq tarawdaǵı jetiskenlik hám nátiyjelerin jáne de joqarı basqıshqa kóteriw, xalqımızdıń abadanlıǵı hám xalıqtıń turmıs tárizin joqarılatıwǵa tiykar bolatuǵın strategiyalıq hújjet boladı. Onı jetilistiriwde watanlaslarımızdıń belsene qatnasıwı, turmıslıq usınıslardı beriwi ayrıqsha áhmiyetke iye.

Muhtarama Komilova, ÓzA